Məhkəmə
Rusiyada adam öldürməyə cəhd edən azərbaycanlılara hökm oxunub.
Lent.az yerli mediaya istinadla bildirir ki, hadisə Yamalo-Nenets Muxtar Dairəsinin Novı Urenqoy şəhərində baş verib.
Məlumata görə, 2024-cü ilin iyun ayında təqsirləndirilən şəxslərdən biri avtomobili idarə edərkən qəsdən zərərçəkmişin üzərinə sürərək ona ağır bədən xəsarətləri yetirib. Adamın hələ də sağ olduğuna əmin olduqdan sonra onu yenidən maşınla vurmağa çalışsa da, zərərçəkən sürünərək uzaqlaşa bilib. Bu zaman digər azərbaycanlı zərərçəkmişə yaxınlaşaraq onun qarnına bıçaq zərbəsi endirib.
Zərərçəkənin fəal müqaviməti və vaxtında tibbi yardım göstərməsi sayəsində o, ölümdən qurtulub.
Faktla bağlı Cinayət Məcəlləsinin 105-ci (bir qrup şəxs tərəfindən adam öldürməyə cəhd) maddəsi ilə cinayət işi açılıb.
Məhkəmə yerli sakini öldürməyə cəhddə təqsirli bilinən iki Azərbaycan Respublikası vətəndaşının hər birini 11 il müddətinə azadlıqdan məhrum edib. Onlar cəzalarını ciddi rejimli həbsxanada çəkəcəklər.
