Azərbaycanda PISA 2025 beynəlxalq qiymətləndirməsinin nəticələri açıqlanıb. Təhsil naziri Emin Əmrullayev bildirib ki, Bakı üzrə şagirdlərin göstəricilərində əvvəlki qiymətləndirmə ilə müqayisədə ciddi artım qeydə alınıb.
Nazirin sözlərinə görə, riyaziyyat üzrə nəticələr 63 bal, təbiət elmləri üzrə 60 bal, oxu savadlılığı üzrə isə 40 bal yüksəlib. Bu göstəricilər Bakı üzrə ən yüksək irəliləyişlərdən biri hesab olunur.
Emin Əmrullayev qeyd edib ki, əvvəlki qiymətləndirmə ilə müqayisədə baza səviyyəsindən aşağı nəticə göstərən şagirdlərin sayı təxminən iki dəfə azalıb.
PISA 2025 çərçivəsində hazırlanan OECD hesabatı “Gələcəyə hazır şagirdlər” adlanır. Hesabatda oxu savadlılığının xüsusi əhəmiyyəti vurğulanır. Nazir bildirib ki, oxu bacarığı bütün digər öyrənmə istiqamətlərinin əsasını təşkil edir və bu sahədə nəticələrin yaxşılaşdırılması təhsil sistemi üçün mühüm vəzifələrdəndir.
Bu il PISA qiymətləndirməsində Azərbaycanın bütün iqtisadi rayonları əhatə olunub. Bu isə ölkənin müxtəlif bölgələrində şagird nailiyyətlərinin müqayisəli şəkildə qiymətləndirilməsinə və regional mənzərənin daha dəqiq formalaşdırılmasına imkan verib.
Nazir bildirib ki, PISA 2029 qiymətləndirməsi Azərbaycanın təhsil sistemində baş verən dəyişiklikləri və inkişaf dinamikasını daha aydın izləməyə şərait yaradacaq.
Onun sözlərinə görə, PISA yalnız nəticələrin ölçülməsi vasitəsi deyil. Qiymətləndirmə təhsil sisteminin inkişaf istiqamətlərinin müəyyənləşdirilməsi üçün mühüm göstəricilərdən biridir.
Emin Əmrullayev nəticələrin əldə olunmasında əməyi olan müəllimlərə, şagirdlərə və valideynlərə təşəkkür edib.
