su
Ölkədə içməli su ilə bağlı ciddi problemlər var. Rəsmi olaraq “Azərsu”, “Meliorasiya və Su Təsərrüfatı Açıq Səhmdar Cəmiyyəti” ləğv edilərək yeni qurum yaradıldı. Amma hələ ki, problemlər həlli tapa bilmir.
AzPost bildirir ki, bir neçə il əvvəl əhalini binaların damında qoyduqları su çənlərini sökməyə məcbur elədilər, ki, su daimi olacaq. Amma Bakının ənənəvi suya həsrət qalan hissəsi olan Əhmədli və Günəşli də daxil olmaqla ətraf qəsəbələrdə su saatla verilir.
Hələ 2023-cü ildə ləğv edilmiş “Azərsu” məlumat vermişdi ki, Bakıda əhalinin 82%-ni fasiləsiz içməli su ilə təmin olunur. 18 % müəyyən saatlarda su ala bilir. Səbəb isə yağıntıların az olması və Taxtakörpü su anbarında suyun səviyyəsinin aşağı düşməsi göstərilmişdi.
2024-cü ildə isə yeni yaradılan Dövlət Su Ehtiyatları Agentliyinə daxil olan İri Şəhərlərin Birləşmiş Su Təchizatı Xidməti suyun fasilələrlə verilməsini Oğuz-Qəbələ xəttində təmir-bərpa işlərinin aparılması ilə əlaqələndirdi. Hətta qurumdan bildirilmişdi ki, ərazilərin təminatında həm də su maşınlarından istifadə olunacaq.
Yağıtılar da çoxaldı, Taxtakörpü su anbarı da düzəldi, Oğuz-Qəbələ xəttində təmir-bərpa işləri yekunlaşdı, amma fasiləsiz su problemi həll olunmayıb.
Məsələ ilə bağlı İri Şəhərlərin Birləşmiş Su Təchizatı Xidmətindən isə bildirirldi ki, Bakı şəhərində məskunlaşma dəfələrlə artıb və su təchizatına qoşulanların da sayı çoxalıb. Hamıya su verilə bilsin deyə, elə ərazilər var ki, orada qrafik rejim fəaliyyət göstərir. Qurumdan o da bildirildi ki, Bakıda məskunlaşmanın səbəbi çoxdur, həmçinin qeyri-qanuni qoşulmalar da vəziyyətə mənfi təsir edir.
