Bu ilin oktyabr ayından Azərbaycan Gənclər və İdman nazirliyi, İƏT Gənclər Forumu Avrasiya Regional Mərkəzi, Bakı Dövlət Universitetinin birgə tərəfdaşlığı ilə “İslam Əməkdaşlıq Təşkilatı (İƏT) Modeli Beynəlxalq Münasibətlər Akademiyası – 2025” layihəsinə start verilib.
Layihə çərçivəsində bu günə qədər Cənubi Qafqaz Tədqiqatlar Mərkəzinin direktoru Fərhad Məmmədov “44 Günlük Vətən Müharibəsinin nəticələri kontekstində Cənubi Qafqazın təhlükəsizlik sistemi”, Qoşulmama Hərəkatı Gənclər Təşkilatının Sədri və COP29-un Gənc İqlim Çempionu Leyla Həsənova “Beynəlxalq təşkilatların və tədbirlərin qlobal tanınmada və maraqların qorunmasında əhəmiyyəti“, Azərbaycan İlahiyyat Universitetitinin rektoru Aqil Şirinov “İslam sivilizasiyası dünyaya nə verdi?”, Azərbaycan Respublikası Elm və Təhsil Nazirinin müşaviri Nicat Məmmədli “Elm, texnoloji tərəqqi və dövlət suverenliyi“, İƏGF Avrasiya Regional Mərkəzinin baş direktoru Rafiq İsmayılov “Beynəlxalq münasibətlərdə pərdəarxası müəyyənedici amillər“, Azərbaycan Respublikasının ilk baş naziri, fövqəladə və səlahiyyətli səfir, t.e.d. Həsən Həsənov “Beynəlxalq münasibətlərdə şəxsi əlaqələr, kommunikasiyanın əhəmiyyəti və təcrübəyə əsaslanan addımlar”, eləcə də Mərakeş Krallığının Azərbaycandakı səfiri Məhəmməd Adil Embarş “Qlobal məsələlərdə beynəlxalq təşkilatların rolu: Mərakeşin xarici siyasət prioritetləri və Azərbaycanla əlaqələr” Türkiyənin Azərbaycandakı səfiri Birol Akgün “Müsəlman dünyasınıda Türkiyənin rolu: çağırışlar və imkanlar”, Qırğızıstan səfiri Maksat Mamıtkanov “Beynəxalq təşkilatların beynəlxalq münasibətlərdə rolu, Qırğızıstan Azərbaycan münasibətləri”, Fələstinin Azərbaycandakı səfiri Əhməd Metani “Fələstin məsələsində beynəlxalq həmrəyliyin rolu” mövzuları üzrə tələbələr qarşısında çıxış ediblər, onları maraqlandıran suallara cavab veriblər.
Qeyd edək ki, 6 həftə ərzində davam edəcək “İƏT Modeli Beynəlxalq Münasibətlər Akademiyası – 2025” layihəsi çərçivəsində İƏT ölkələrini Azərbaycanda təmsil edən diplomatik missiya rəhbərləri, eləcə də azərbaycanlı rəsmilər və sahə üzrə ekspertlər beynəxalq münasibətlər, dövlət quruculuğu, islam sivilizasiyası, İƏT-in dünyada rolu, milli dövlətçiliyin əsasları və digər aktual mövzular üzrə məruzələrlə çıxış edəcəklər.
Bu ilin dekabr ayının əvvəli Bakı şəhərində azərbaycanlı tələbələrin iştirakı ilə İƏT xarici işlər nazirlərinin konfransının simulyasiyası planlaşdırılır.
Ötən illər ərzində azərbaycanlı tələbələr dəfələrlə İƏT-ə üzv olan 40-dan artıq ölkə nümayəndəsinin iştirak etdiyi “Beynəlxalq İƏT Modeli” yarışmalarında Azərbaycanı layiqli şəkildə təmsil ediblər.
