Son zamanlar Bakıda ev qiymətləri və kirayə bazarı ilə bağlı müzakirələr artıb. Xüsusilə gənclər, yeni evlənənlər və tələbələr üçün mərkəzə yaxın ərazilərdə normal şəraitli və uyğun qiymətə kirayə ev tapmaq demək olar ki, qeyri-mümkün bir tapşırığa çevrilib.
Azpost.info bildirir ki, bir neçə il əvvəl 300-400 manata tapılan normal təmirli mənzillər, bu gün artıq 600-700 manatdan aşağı təklif olunmur.
Bəs paytaxtın kirayə bazarında bu “yanğın”ın real səbəbləri nədir? Mövzu təkcə maklerlərin insafına qalıb, yoxsa burada daha dərin iqtisadi faktorlar var?
1. Şəhərin mərkəzinin “böyüməsi” və söküntülər
Bakının mərkəzi hissələrində, xüsusən köhnə birtəbəqəli, “şüşəbənd” evlərin və qəzalı binaların sökülməsi prosesi sürətlə davam edir. Bu söküntülər minlərlə ailənin müvəqqəti olaraq kirayə bazarına axışmasına səbəb olur. Tələb birdən-birə artır, təklif isə eyni sürətlə böyümür. Nəticədə qiymətlər yuxarı dırmaşır.
Azərbaycanda pulu olan şəxslər üçün ən təhlükəsiz və gəlirli investisiya forması hələ də mənzil almaqdır. İnsanlar pullarını inflyasiyadan qorumaq üçün yeni tikililərdən evlər alır və dərhal kirayəyə verirlər. Onlar da qoyduqları kapitalı tez çıxarmaq üçün təbii ki, yüksək kirayə haqqı tələb edirlər.
3. Turizm və “gündəlik kirayə” bumu
Bunu da danmaq olmaz. Şəhərin mərkəzində (Fəvvarələr meydanı, Nizami küçəsi, 28 May tərəflərdə) ev sahibləri mənzili tələbəyə və ya gənc ailəyə aylıq 600 manata verməkdənsə, xarici turistlərə günlük 60-80 manata verməyi daha üstün tuturlar. Bu da aylıq kirayə bazarına çıxarılan evlərin sayını kəskin azaldır.
Analitiklər yaxın aylarda kirayə qiymətlərində ciddi bir ucuzlaşma gözləmirlər. Xüsusilə yay aylarının sonuna doğru, universitetlərə qəbul sənədləri açıqlananda və Bakıya növbəti tələbə axını başlayanda rəqabət daha da güclənəcək. Görünən odur ki, Bakıda kirayə problemi yaxın gələcəkdə həm sosial, həm də iqtisadi gündəmin ən qaynar mövzusu olaraq qalacaq.
S.Aydın
