Yeni tədris ilinin başlaması Bakıda kirayə mənzil bazarında hərəkətliliyi kəskin artırıb. Xüsusilə bölgələrdən paytaxta gələn tələbələr həm münasib qiymətə ev tapmaqda, həm də boş mənzil əldə etməkdə çətinlik çəkirlər.
Hazırda tələbələrin daha çox üstünlük verdiyi, universitetlərə və metrostansiyalara yaxın ərazilərdə 1-2 otaqlı mənzillərin kirayəsi 500–600 manatdan başlayır. Mərkəzi ərazilərdə isə bu rəqəm 700 manata qədər yüksələ bilir.
Əmlak məsələləri üzrə ekspert Elnur Azadovun açıqlamalarına görə, yeni qəbul olunan, xüsusilə bölgələrdən gələn tələbələrin mənzilə tələbi bazarda ciddi sıxlıq yaradıb.
Tələbə üçün 500 manatlıq ev də artıq ucuz sayılmır
Bakıda tək mənzil kirayələmək tələbələrin əksəriyyəti üçün ciddi xərcdir. Buna görə daha münasib variant kimi otaq kirayəsi və mənzilin digər tələbələrlə paylaşılması geniş yayılıb.
Ev sahibi ilə birlikdə qalmaq şərtilə bir nəfər üçün otağın qiyməti orta hesabla 200 manat təşkil edir. Belə mənzillərdə otaq bir və ya iki tələbə ilə də paylaşıla bilər.
Bu variant tələbənin aylıq xərcini azaltsa da, şəxsi məkan və yaşayış şəraiti baxımından ayrıca mənzildən fərqlənir.
600 manata harada ev tapmaq olar?
Şəhərin mərkəzindən və əsas universitetlərdən uzaqlaşdıqca nisbətən münasib qiymətlərə rast gəlmək mümkündür.
Məsələn, “Neftçilər” və “Qara Qarayev” metrostansiyaları ətrafında köhnə binalarda 2 otaqlı mənzilləri təxminən 600 manat civarında tapmaq mümkündür.
Daha ucuz variant axtaranlar isə şəhərətrafı ərazilərə üz tuturlar. Xırdalan, Masazır, Yeni Günəşli, Hövsan və Sulutəpə kimi ərazilərdə kirayə qiymətləri mərkəzə nisbətən daha aşağı ola bilər.
Lakin burada əsas problem universitetə gediş-gəlişdir. Daha ucuz ev üçün tələbə hər gün nəqliyyata əlavə vaxt və pul sərf etməli olur.
Niyə qiymətlər bahalaşıb?
Ekspertlərin fikrincə, hazırkı bahalaşmanı yalnız tələbələrin Bakıya axını ilə izah etmək düzgün deyil.
Yeni tədris ili ilə bağlı mövsümi tələbat qiymətlərə əlavə təzyiq yaratsa da, mənzillərin satış qiymətlərinin yüksəlməsi və ümumi əmlak bazarındakı dəyişikliklər də kirayə haqlarına təsir göstərir.
Hazırda xüsusilə universitetlərə, metrostansiyalara və şəhərin mərkəzinə yaxın mənzillərə tələb yüksəkdir.
Kirayə bazarı nə vaxt rahatlaşacaq?
Ekspertlərin proqnozlarına görə, dərslərin başlamasından və tələbələrin böyük hissəsinin yerləşməsindən sonra bazardakı gərginlik tədricən azala bilər.
Xüsusilə sentyabrın sonu – oktyabrın əvvəllərində mənzil axtarışının nisbətən rahatlaşacağı gözlənilir.
Bu isə o deməkdir ki, hazırda ev tapa bilməyən tələbələr üçün bir neçə həftə sonra seçim imkanları arta bilər.
Ancaq qiymətlərin əvvəlki səviyyəyə qayıdacağına zəmanət yoxdur. Çünki kirayə bazarında qiymətləri yalnız tələbə tələbi deyil, mənzillərin satış qiymətləri və ümumi bazar şərtləri də müəyyənləşdirir.
Tələbə üçün real seçim belə görünür: şəhərin mərkəzində və universitetə yaxın ərazidə ayrıca mənzil üçün ən azı 500–600 manat, daha qənaətli variant üçün isə otaq kirayəsi və ya mənzili digər tələbələrlə paylaşmaq lazım gəlir.
S.Abdulla
