İdmanla məşğul olan bir çox insan məşqdən sonra baş ağrısı ilə üzləşir.
AzPost bildirir ki, mexanoterapiya üzrə mütəxəssis Vladimir Bondarenko bu problemin əsas səbəbini qan dövranının pozulması və məşq texnikasına lazımi diqqət yetirilməməsi ilə əlaqələndirir.
Onun sözlərinə görə, ən vacib qaydalardan biri baş və boyun vəziyyətinə nəzarətdir. Mütəxəssis vurğulayıb ki, pilates prinsiplərinə uyğun olaraq boyun və bel neytral vəziyyətdə saxlanmalı, çənə yüngülcə döş qəfəsinə yaxın olmalıdır. Bu qaydaların pozulması baş ağrısının yaranmasına şərait yaradır.
Bondarenko əlavə edib ki, məşq zamanı çənənin döş qəfəsinə və körpücük sümüyünə nisbətdə sabit vəziyyətdə qalması zəruridir. O, həmçinin kürək sümüklərinin işinə diqqət etməyi vacib sayır. Çünki döş qəfəsinin stabilliyi və hərəkətliliyi birbaşa boyunun vəziyyətinə təsir göstərir.
Mütəxəssis qeyd edib ki, döş qəfəsindəki problemlər əks-təsirlə boyunda ağrı və gərginlik yarada bilər. Buna görə də həmin nahiyənin elastikliyinə diqqət yetirilməlidir.
Baş ağrısının qarşısını almaq üçün o, fitnes məşqlərinə miofasial reliz texnikasının əlavə edilməsini tövsiyə edir. Bu üsul öz-özünə masaj formasıdır və xüsusi rollar, toplar vasitəsilə əzələlərin rahatlamasına kömək edir.
Bondarenko əlavə edib ki, məşq proqramına boyun üçün statik hərəkətlərin daxil edilməsi də yükün azalmasına və baş ağrılarının qarşısının alınmasına müsbət təsir göstərir.
