Türkiyənin Bayraktar TB3 pilotsuz uçuş aparatı sualtı qayıqlara qarşı mübarizə sahəsində yeni imkanını ilk dəfə nümayiş etdirib. Aparat TCG Anadolu universal desant gəmisinin göyərtəsindən dənizə iki hidroakustik şamandıra atıb və onların vasitəsilə əldə olunan sualtı məlumatları emal edib.
“Anadolu”nun məlumatına görə, sınaqlar sentyabrın 20-dən 25-dək Qara, Mərmərə, Egey və Aralıq dənizinin şərq hissəsində keçirilən “Dəniz qurdu-I/2026” (Denizkurdu-I/2026) hərbi təlimləri çərçivəsində həyata keçirilib.
Təlimlər zamanı Bayraktar TB3 sualtı qayıqlara qarşı müdafiə tapşırıqlarını dəniz patrul təyyarəsi ilə birgə yerinə yetirib. Pilotsuz aparat TCG Anadolu gəmisindən havaya qalxıb və uçuş zamanı Baykar şirkəti tərəfindən hazırlanmış SAS POD sistemi vasitəsilə dənizə iki hidroakustik şamandıra buraxıb.
Sonobuylar sualtı obyektlərin aşkarlanması və izlənməsi üçün istifadə olunur. Suya düşdükdən sonra onlar akustik məlumatlar toplayır və sonrakı emal üçün bu məlumatları ötürür.
Sınaq zamanı Bayraktar TB3 yalnız öz aşkarlama imkanlarından istifadə etməyib. Pilotsuz aparat həm özünün dənizə buraxdığı iki sonobuydan, həm də dəniz patrul təyyarəsi tərəfindən yerləşdirilmiş şamandıralardan daxil olan məlumatları qəbul edib və emal edib.
Bunun üçün aparatın göyərtəsində sonobuylardan daxil olan məlumatların emalı üçün xüsusi moduldan istifadə olunub.
Baykar həmçinin təlimlər zamanı əldə edilən sualtı məlumatların real vaxt rejimində birbaşa nümayiş etdirilməsi imkanını göstərib.
Beləliklə, Bayraktar TB3 pilotlu dəniz patrul təyyarəsi ilə birlikdə sualtı hədəflərin axtarışı və aşkarlanması üzrə birgə əməliyyata inteqrasiya olunub.
“Dəniz qurdu-I/2026” təlimlərində Türkiyə Hərbi Dəniz Qüvvələri, Quru Qoşunları və Hərbi Hava Qüvvələri ilə yanaşı, Sahil Mühafizəsinin bölmələri də iştirak edir.
Baykar Türkiyənin ən böyük hərbi pilotsuz uçuş aparatı istehsalçılarından biridir. Şirkət 2025-ci ildə 2,2 milyard dollar dəyərində məhsul ixrac edib. Son illərdə şirkətin gəlirlərinin təxminən 90 faizi ixracın payına düşüb.
Şirkətin məlumatına görə, Bayraktar TB2 pilotsuz aparatlarının tədarükü ilə bağlı ixrac müqavilələri 36 ölkə ilə, daha ağır zərbə PUA-sı Bayraktar Akıncı ilə bağlı müqavilələr isə 16 ölkə ilə imzalanıb.
Ümumilikdə Baykar 39 dövlətlə ixrac müqavilələri bağlayıb.
