Beynəlxalq bank
Azərbaycan Beynəlxalq Bankının (ABB) bir müştərisinin başına gələn hadisə ictimaiyyətdə narahatlıq doğurub.
AzPost xəbər verir ki, Balakən sakini Əsgər Axundov iyunun 12-dən 13-nə keçən gecə saat 02:50-də maaş kartından 5251 manat vəsaitin xəbərsiz şəkildə xarici saytlara köçürüldüyünü bildirib.
Ən diqqətçəkən məqam isə budur ki, əməliyyat OTP (birdəfəlik şifrə) göndərilmədən həyata keçirilib. Əsgər Axundov iddia edir ki, kart heç bir saytda və proqramda qeydiyyatdan keçməyib, eləcə də heç bir fişinq linkinə daxil olmayıb və kənar şəxslərlə məlumat paylaşmayıb.
Pulun köçürüldüyü “Hapiness” və “Khankyun” adlı saytların heç birinə onun tərəfindən giriş edilmədiyi bildirilir. Axundov deyir ki, iyunun 13-də kart ABB tərəfindən bloklansa da, bank yalnız ayın 17-də filialda chargeback (pulun geri alınması) sorğusu yaratmağı tövsiyə edib.
O, Balakən filialına yaxınlaşdıqdan sonra isə ABB-nin cavabı daha da məyusedici olub. Belə ki, bank əməkdaşları OTP-siz əməliyyat olduğunu təsdiqləsələr də, Mastercard-ın bu cür əməliyyatlar üçün sorğunu qəbul etmədiyini bildirərək, vətəndaşı hüquq-mühafizə orqanlarına yönləndiriblər.
ABB isə sosial şəbəkə üzərindən verdiyi açıqlamada, müştəridən FIN kodunu və əlaqə nömrəsini şəxsi mesajla göndərməsini istəyib və araşdırma aparılacağını qeyd edib.
Mütəxəssislər bildirirlər ki, OTP-siz əməliyyatlar yalnız müəyyən hallarda – məsələn, “card-on-file” sistemlərində və ya zəif təhlükəsizlik səviyyəsinə malik ticarət platformalarında mümkün ola bilər. Mütəxəssislər hesab edir ki, bildirib ki, belə əməliyyatların bank tərəfindən bloklanmaması bankın sistemində ciddi boşluqdan qaynaqlana bilər.
