Biləsuvar sakini ölkənin iri pambıqçılıq şirkətini məhkəməyə verib

“MKT İstehsalat Kommersiya”MMC və şirkətin Biləsuvar filalı məhkəməyə verilib.

Azpost.info xəbər verir ki, iddiaçı Əliyev Nicat Elsevər oğlu adlı vətəndaşdır. Onun tələbi işə bərpa və əmək haqqının ödənilməsi ilə bağlıdır. İş hazırda apellyasiya mərhələsindədir.

Əldə etdiyimiz məlumata görə, birinci instansiya məhkəməsi Nicat Əliyevin iddiasını təmin etməyib. O da apellyasiya şikayəti verib. Vətəndaşın şikayətinə Bakı Apellyasiya Məhkəməsinin hakimi Günay Axundovanın sədrliyi ilə baxılacaq.

“MKT İstehsalat Kommersiya” MMC 23 aprel 2004-cü ildə qeydiyyata alınıb. Nizamnamə kapitalı 357 263 923.51 AZN olan şirkətin qanuni təmsilçisi Həsənov Rövşən Həsən oğludur. Rövşən Həsənov həm də MMC-nin İdarə Heyətinin sədridir.

O, bundan əvvəl “GT Cotton Holdings” MMC-nin rəhbəri olub. “GP Cotton Holdings” MMC ilə “MKT İstehsalat Kommersiya” MMC vaxtilə eyni hüquqi ünvanda – Bakı şəhəri Nərimanov rayonu, Heydər Əliyev prospekti, ev 95-də yerləşiblər. Bu ünvanda “Gilan Holding” və ona bağlı şirkətlər də qeydiyyatda olub.

Sonradan “Gilan Holding”və “GP Cotton Holdings”in hüquqi ünvanı dəyişib.

Hazırda hər iki şirkət Bakı şəhəri Yasamal rayonu, Nəriman Nərimanov prospekti, ev 206, məhəllə 466-da yerləşir. Hüquqi ünvanların dəyişdirilməsi təsadüfi deyil. Çünki hər üç şirkətin fövqəladə hallar naziri Kəmaləddin Heydərova bağlılığı barədə məlumatlar var. Yerli mediada bu barədə kifayət qədər yazılıb və indiyə qədər təkzib olunmayıb.

Yeri gəlmişkən, “MKT İstehsalat Kommersiya” MMC-nin rəhbəri Rövşən Həsənov bir neçə il əvvəl Prezident İlham Əliyevin sədrliyi ilə keçirilən müşavirədə Avstraliya ilə Avstriyanı səhv salması ilə yadda qalmışdı.

Prezidentlə Rövşən Həsənov arasındakı həmin məşhur dialoqu təqdim edirik:

“Prezident İlham Əliyev: Siz deyirsiniz ki, məhsuldarlığa görə MKT dünyada ilk onluqdadır. Ən çox məhsuldarlığı olan ölkələr hansılardır?  Sizdə bu məlumat var?

Rövşən Həsənov: Bəli var, cənab Prezident. İlk onluqda olan ölkələr Çin, İsrail, Avstriya, Braziliya, Meksikadır. Prezident İlham Əliyev: Avstriyada da pambıq yetişdirilir?

Rövşən Həsənov: Çox üzr istəyirəm, Avstraliya, Braziliya, Meksika, Yunanıstan”.

Hüseyn Abbas

Əvvəlki məqalə

Çinin yeni XİN rəhbəri Afrika turnesinə çıxır

Sonrakı məqalə

“Türkiyə PUA-ları Qarabağda dünya müharibə qaydalarını dəyişdirdi” –