Birləşmiş Millətlər Təşkilatı (BMT) ilk dəfə olaraq Qəzza zolağında “katastrofik aclıq” vəziyyəti elan edib.
AzPost bildirir ki, təşkilatın hesabatına görə, yarım milyondan artıq insan aclıq, yoxsulluq və qarşısı alına biləcək ölümlərlə üz-üzə qalıb.
BMT-nin ərzaq təhlükəsizliyi üzrə təsnifatında beş mərhələ mövcuddur. Üçüncü mərhələ qida çatışmazlığı böhranı, dördüncü mərhələ fövqəladə vəziyyət, beşinci mərhələ isə “katastrofik aclıq” sayılır. Qəzzada hazırda vəziyyət ən sonuncu – beşinci səviyyəyə yüksəlib.
Təşkilatın proqnozuna görə, sentyabrın sonuna qədər bölgədə altı yüz qırx mindən çox insan ən ağır aclıq mərhələsində olacaq. Daha bir milyon yüz qırx min nəfər fövqəladə aclıq, təxminən dörd yüz min nəfər isə böhran səviyyəsində qida çatışmazlığı ilə üzləşəcək.
BMT-nin məlumatına əsasən, vəziyyət həm humanitar yardımların məhdudluğu, həm də bölgədə davam edən silahlı münaqişə ilə daha da ağırlaşıb. Ekspertlər xəbərdarlıq edirlər ki, beynəlxalq ictimaiyyət təcili tədbirlər görməsə, bölgədə insan itkilərinin miqyası kəskin artacaq.
