Böyük Britaniyada Kir Starmerin rəhbərlik etdiyi hökumət əvvəlki hakimiyyətlərlə müqayisədə Ukraynanı daha az dəstəkləyir.
Azpost.info xəbər verir ki, bunu Britaniyanın “The Times” qəzetinə müsahibəsində Ukraynanın keçmiş xarici işlər naziri Dmitri Kuleba deyib.
“Britaniya rəsmiləri ilə etdiyim yeganə xoşagəlməz söhbət istefa verməyimdən bir neçə həftə əvvəl baş verdi. Bu, “Storm Shadow” raketlərinin tədarükü və onların konkret hədəflərə qarşı istifadəsi ilə bağlı yeni hökumətin ehtiyatlı davranması ilə bağlı idi. Bir şey etmək istəmədiyiniz zaman bunun niyə mümkün olmadığını izah edən beş səhifəlik izahat qeydini asanlıqla hazırlaya bilərsiniz”, – Kuleba bildirib.
O qeyd edib ki, əvvəllər Böyük Britaniya Ukraynanı dəstəkləməkdə aparıcı rol oynayıb. Belə ki, London ilk olaraq Kiyevə tanklar və uzaqmənzilli raketlər ötürdü, lakin Starmerin dövründə Britaniya qərar qəbul edərkən müstəqil hərəkət etmir, ABŞ-ı rəhbər tutur.
“Bu, Leyboristlər dövründə baş verən dəyişiklikdir. Onlar elə bir mövqe tutdular ki, etdikləri hər şeydə amerikalıları izləyirlər”, – Kuleba deyib.
Kir Starmer 5 iyul 2024-cü ildə Böyük Britaniya hökumətinin başına keçdi. O vaxtdan bəri Starmer Ukraynaya getməyib.
Azpost.info
