Britaniya
Böyük Britaniya yeni hərbi strategiya ilə Avropada müharibəyə hazırlaşır.
AzPost xəbər verir ki, Böyük Britaniya hökuməti Rusiya və Çinə qarşı hərbi gücünü artırmaq məqsədilə yeni təhlükəsizlik strategiyası üzərində çalışır. Bu addımlar ölkənin həm Avropada, həm də Atlantikdə mümkün silahlı qarşıdurmalara hazır olması ilə izah olunur. “Strateji Müdafiə İcmalı” adlı 130 səhifəlik sənəddə ordunun döyüş hazırlığının artırılması və silah ehtiyatlarının genişləndirilməsi planlaşdırılır.
Sənəddə Rusiya “təcili və aktual” təhlükə, Çin isə “mürəkkəb və davamlı çağırış” kimi qiymətləndirilir. Hesabat həmçinin İran və Şimali Koreyanı da regional sabitliyi pozan potensial düşmənlər kimi qeyd edir. Müdafiə naziri Con Healey hazırda Britaniya Silahlı Qüvvələrinin “işə qəbul və saxlamada 15 illik böhran” yaşadığını və ordunun sayının 70 min nəfərə qədər azaldığını bildirib.
Healey ordunun sayını artırmağı qarşıdakı parlament dövrünə planlaşdırır və bu məqsədlə əlavə 2,5 milyard funt sterlinq xərclə 76 min nəfərlik ordu qurulacağı barədə şayiələr dolaşır. Müdafiə sənədində Britaniyanın nüvə təhdidlərinə qarşı sualtı qayıqlar istehsalı, Trident sisteminin yenilənməsi və 9 minə yaxın yeni iş yerinin yaradılması nəzərdə tutulur.
Böyük Britaniyanın ABŞ və Avstraliya ilə birgə “Aukus” proqramı çərçivəsində nüvə sualtı qayıqları istehsal etməsi də bu strategiyanın tərkib hissəsidir. İlk qayıqların 2030-cu illərin sonlarında istifadəyə verilməsi planlaşdırılır. Digər tərəfdən, hava bazalı nüvə qarşısının alınması üçün ABŞ-ın B61-12 tipli bombalarını daşıya biləcək F-35A təyyarələrinin alınması məsələsi də gündəmdədir.
The Guardian yazır ki, hazırda müdafiə büdcəsində hər hansı dərhal artım gözlənilmir. Lakin 2027-ci ilə qədər ÜDM-in 2,5%-nə, sonrakı mərhələdə isə 3%-ə çatdırılması planlaşdırılır. Ayın sonunda Haaqa sammitində NATO liderlərinin bu xərc artımını müzakirə edəcəyi gözlənilir. Yeni planlar həmçinin strateji obyektlərin dron və texnoloji hücumlardan qorunması üçün könüllü milislərin yaradılmasını da əhatə edir.
