Çin 2027 və 2028-ci illərdə ABŞ-dan hər il ən azı 10 milyon metrik ton kömür almağa razılaşıb.
Bu barədə Ağ Ev məlumat yayıb. Vaşinqton əldə olunan razılaşmanı dünyanın iki ən böyük iqtisadiyyatı arasında ticarət fikir ayrılıqlarının azaldılması istiqamətində yeni addım kimi qiymətləndirib. Məlumatı “Bloomberg” yayıb.
Razılaşma ABŞ-Çin Ticarət Şurasının fəaliyyəti çərçivəsində əldə olunub. Kömür alışından əlavə, Vaşinqton və Pekin həssas kateqoriyalara aid olmayan, ümumi dəyəri təxminən 30 milyard dollar olan mallar üçün daha əlverişli tarif şərtlərinin təmin edilməsinə çalışmaq barədə də razılığa gəliblər.
Ağ Ev hesab edir ki, əldə olunan razılaşmalar ABŞ və Çin arasında daha balanslaşdırılmış ticarət münasibətlərinin qurulması səylərinin bir hissəsidir.
ABŞ kömürünün alınması Pekinin yeni razılaşma çərçivəsində üzərinə götürdüyü ən konkret öhdəliklərdən biri olacaq. Çin dünyanın ən böyük kömür istehlakçısıdır, ABŞ isə bu yanacağın əsas istehsalçıları sırasında yer alır.
Yeni razılaşma Vaşinqtonla Pekin arasında ticarət gərginliyinin azaldığına dair növbəti siqnal kimi qiymətləndirilir. Son illərdə iki ölkə dəfələrlə bir-birinin məhsullarına tarifləri artırıb, həmçinin mallar və texnologiyalarla bağlı müxtəlif məhdudiyyətlər tətbiq edib.
Ağ Evin açıqlamasına görə, tərəflər ABŞ və Çinin həssas hesab etdiyi kateqoriyalara daxil olmayan mallara tətbiq edilən tariflərlə bağlı danışıqları da davam etdirmək niyyətindədir.
Razılaşmalar ABŞ Prezidenti Donald Tramp və Çin Sədri Si Cinpin arasında ölkələr arasındakı ticarət ziddiyyətlərinin daha da azaldılmasına yönəlmiş təmaslar fonunda əldə olunub.
