Çinin CXMT şirkəti yeni nəsil yaddaş çiplərinin kütləvi istehsalına başlayıb. Şirkət beşinci nəsil DRAM texnologiya platformasının artıq istehsala daxil olduğunu açıqlayıb.
Reuters yazır ki, bu, Çinin Samsung Electronics, SK Hynix və Micron kimi qlobal şirkətlərin üstünlük təşkil etdiyi yaddaş çipləri bazarında mövqeyini gücləndirmək cəhdi baxımından mühüm texnoloji addımdır.
Yeni platforma daha güclü yaddaş çiplərini daha aşağı qiymət və daha az enerji sərfiyyatı ilə istehsal etməyə imkan verir.
CXMT məlumat saxlama elementləri arasındakı məsafəni 11,95 nanometrə qədər azaldıb. Bu texnologiya bir çip üzərində daha çox məlumat yerləşdirməyə və bir silikon lövhədən daha çox çip əldə etməyə imkan verir.
Şirkət yeni platformada “quadruple patterning” adlı istehsal texnologiyasından istifadə etdiyini açıqlayıb.
CXMT həmçinin iki yeni 24 giqabitlik LPDDR5X yaddaş çipi təqdim edib. Şirkətin məlumatına görə, bu çiplər əvvəlki analoji məhsullardan 50 faiz daha çox məlumat saxlaya bilir.
LPDDR5X əsasən smartfonlarda və digər portativ elektron cihazlarda istifadə olunan enerjiyə qənaətli DRAM yaddaş texnologiyasıdır.
CXMT yeni platformanın əvvəlki nəsillə müqayisədə bir silikon lövhədən ən azı 50 faiz daha çox çip istehsal etməyə imkan verdiyini bildirir.
Çinin bu sahədə irəliləyişi Pekinin xarici yarımkeçirici texnologiyalarından asılılığı azaltmaq siyasəti fonunda baş verir. ABŞ 2022-ci ildən etibarən Çinin qabaqcıl çip istehsalı avadanlıqlarına və müvafiq proqram təminatına çıxışını məhdudlaşdırır.
Reuters qeyd edir ki, yeni texnologiya Çinin daxili çip istehsalı imkanlarını gücləndirə və ölkənin qlobal yaddaş çipləri bazarındakı rəqabət qabiliyyətini artıra bilər.
