Corc Vaşinqton
ABŞ-ın İnqlvud şəhərinin polisi ölkənin ilk prezidenti Corc Vaşinqtonun təsvir olunduğu oğurlanmış rəsmi taparaq geri qaytarıb.
Qaynarinfo xəbər verir ki, bu barədə “CBS News” məlumat yayıb.
Rəsm əsəri oğurluqdan bir ildən çox vaxt keçdikdən sonra aşkar edilib. Şüşə üzərində işlənmiş bu portret məşhur amerikalı rəssam Gilbert Stüartın yaratdığı Vaşinqton portretinin surətidir.
“Freeman’s” hərrac evinin təsviri incəsənət üzrə direktoru Monika Braun bildirib ki, bu rəsmin 1798-ci ildə naməlum çinli rəssamlar tərəfindən yaradıldığı ehtimal edilir. Dünyada bu cür təxminən 100 nüsxə mövcud olub, lakin hazırda onlardan yalnız altısı barədə məlumat var. Dördü muzey kolleksiyalarında saxlanılır, bir neçəsi isə şəxsi kolleksiyalarda yer alır.
Braunun sözlərinə görə, bu tip rəsmlərin qiyməti vəziyyətindən asılı olaraq dəyişir, lakin ABŞ-ın qurucu atalarının təsvirləri sənət bazarında yüksək tələbatla qarşılanır. Onun fikrincə, tapılan rəsmin dəyəri 150 min dollara çata bilər.
Corc Vaşinqtonun təsvir olunduğu bu rəsm əsəri 2024-cü ilin yanvar ayında İnqlvud şəhərindəki bir anbarlardan oğurlanmışdı. Məsələni araşdıran polis zabiti Kristian Kontos bildirib ki, əsər otelin tərk edilmiş otağında tapılıb. Hadisə ilə bağlı hələlik heç kim saxlanılmayıb və oğrunun kimliyi naməlum olaraq qalır.
“Çox güman ki, oğru onun dəyərindən xəbərsiz olub və əsəri hansı problemlərə səbəb ola biləcəyini anlayaraq tərk edib. Oğurlanmış sənət əsərlərini internetdə açıq şəkildə satışa çıxarmaq asan deyil”, deyə detektiv qeyd edib.
