Almaniyanın keçmiş kansleri Angela Merkel Ukrayna prezidenti Vladimir Zelenskinin tənqidlərinə baxmayaraq, 2008-ci ildə Ukraynanı NATO-ya qəbul etməmək barədə düzgün qərar verdiyini deyib.
Azpost.info xəbər verir ki, bu barədə DPA agentliyinin müraciəti əsasında Merkelin mətbuat katibi məlumat verib. “Angela Merkel NATO-nun 2008-ci ildə Buxarestdə keçirilən sammiti ilə bağlı qərarlarını dəstəkləyir”, – mətbuat katibi bildirib.
Eyni zamanda, Merkel Rusiyanın Ukraynadakı müharibəsinə son qoymaq üçün beynəlxalq səyləri müdafiə etdiyini deyib. Lakin Buçaya gəlmək dəvətinə cavab verməyib: “Buçada və Ukraynanın başqa yerlərində görünən vəhşilikləri nəzərə alsaq, federal hökumətin və beynəlxalq ictimaiyyətin Rusiyanın vəhşiliyinə və savaşa son qoymaq üçün göstərdiyi bütün səyləri dəstəkləyirəm”.
Xatırladaq ki, bir gün əvvəl Zelenski işgəncələrə məruz qalan ukraynalıları və Rusiyaya siyasi güzəştlərin nəticələrini görmək üçün Almaniyanın keçmiş kansleri Angela Merkeli və Fransanın eks-prezidenti Nikola Sarkozini Buçaya dəvət etmişdi.
Azpost.info
