Paris prokurorluğu keçmiş Fransa prezidenti Nikolya Sarkozinin Parisin Sante həbsxanasında aldığı ölümlə hədələmə ilə bağlı istintaqa başlayıb.
AzPost-un məlumatına görə, bu barədə BFMTV mənbəyə istinadən xəbər verir. Artıq üç nəfər təcrid edilib.
“Europe 1” radiosu xəbər verib ki, Sante həbsxanasındakı üç məhbus təhdidlərə görə təcrid olunub, onların mobil telefonları müsadirə edilib və başqa həbsxanaya köçürülməsi məsələsinə baxılır.
Bundan əvvəl Fransanın daxili işlər naziri Loran Nunes təhdidlərə görə Sarkoziyə həbsxanada iki polisin təyin edildiyini açıqlamışdı.
Xatırladaq ki, 70 yaşlı Sarkozi cəzasını çəkmək üçün Parisin Sante həbsxanasına göndərilib. Məhkəmə onu 2007-ci il seçki kampaniyasının Liviyadan gələn vəsaitlə qanunsuz maliyyələşdirilməsi ilə bağlı cinayət sui-qəsdində iştirak etməkdə təqsirli bildikdən sonra beş il müddətinə azadlıqdan məhrum edib. Sarkozi bütün ittihamları rədd edir.
