Fransa və Polşa 40 min hərbçinin Ukrayanaya göndərilməsi planını müzakirə edir.
Azpost.info bildirir ki, bu barədə Rzeczpospolita nəşri məlumat yayıb.
Bu missiyanın planı üzərində işləyən Fransa Elmlər Akademiyasının Təhlükəsizlik Araşdırmaları Mərkəzinin direktoru Eli Tenenbaum bildirib ki, Polşa və Fransa Rusiyanın atəşkəsi və gələcəkdə müəyyən edilə biləcək demarkasiya xəttini pozmasının qarşısını almaq üçün hərbi əməliyyatlar başa çatdıqdan sonra Ukraynada sülhməramlı missiya yerləşdirmək təklifini müzakirə edir.
Kontingentin beş briqadadan (təxminən 40 min əsgər) ibarət ola biləcəyi planlaşdırılır. Polşa onlardan birinə komandanlıq edə bilər.
Rzeczpospolita yazır ki, prezident Emmanuel Makron və baş nazir Donald Tusk cümə axşamı görüşdə bu məsələni müzakirə edəcəklər.
Avropa ABŞ-ın yeni prezidenti Donald Trampın Kiyevə münaqişənin həlli üçün əlverişsiz şərtlər qoya biləcəyindən ehtiyat edərək, Ukraynada sülh yolu ilə nizamlanma planlarını fəal şəkildə nəzərdən keçirir. Bu baxımdan, Ukraynanın təhlükəsizliyini təmin etmək üçün atəşkəsdən sonra Qərb qoşunlarının yerləşdirilməsi məsələsi getdikcə daha çox gündəmə gətirilir.
