İnsan Hüququları və Qanunçuluğun Müdafiəsi İctimai Birliyi Astarada “Ailə – milli-mənəvi dəyərlərin daşıyıcısıdır” adlı layihənin növbəti tədbirini keçirib. Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin donorluğu ilə həyata keçirilən tədbirə yerli icma təmsilçiləri ilə yanaşı bölgədə fəaliyyət göstərən vətəndaş vəmiyyəti institutlarının, medianın təmsilçiləri də qatılıb.
Dəyirmi Masa formatında keçirilən tədbirdə milli ailə dəyərlərimiz, onların çağdaş həyatda qorunmasının önəmi haqqında geniş fikir mübadiləsi olub. Layihə üzrə təlimçilərdən Nabat Qəniyeva bildirib ki, yeni stereotiplərin yaranması Azərbaycan ailə modelində müsbət tendensiyalar yaratdığı kimi, bir sıra arzuolunmaz məqamlara da yol açıb:“Sözsüz ki, zamanın dəyişməsi ilə əsrlərlə yol keçən milli adət və ənənələrimiz də dəyişir, yeni rəng alır. Amma bu heç də o demək deyil ki, biz milli dəyər halına gələn, sağlam ailə modelinin qoruyucusu olan ənənələrimizi çağdaşlığa qurban verməliyik. Çağdaşlıq yalnız milli dəyərlərə söykənəndə millət üçün dəyər yarada bilir və cəmiyyətdə oturuşur. Bütün dönəmlərdə gənclər yeniliyin, daha yaşlı nəsil isə ənənələrin müdafiəçisi olur. Amma biz bu gün Azərbayana nümunə kimi təqdim olunan cəmiyyət modellərinə baxsaq onu görərik ki, hər millət özünə xas özəllikləri yaşadır, məhz bazasında yeniliklər yaradır. Ona görə də biz dəyərlərimizi qoruyaraq, onların təbliği ilə məşğul olaraq cəmiyyətimizi daha da sağlamlaşdırmağa çalışmalıyıq”.
Dəyirmi Masada iştirak edən yerli icma təmsilçiləri də bildiriblər ki, ənələri yaşadan ailələrdə fərdlər arasında münasibətlər daha sağlam olur. Onların fikrincə, böyük ailələrdə, nənə-baba, ata və ananın qohumları ilə sıx təmasda böyüyən uşaqlar daha sağlam psixoloji duruma sahib olurlar ki, bu da onların cəmiyyətlə daha rahat ünsiyyət qurmasına gətirir. Eləcə də həyatın müxtlif situasiyalarında fərdlərin öz ailələrinin dəstəyini hiss etmələri hər bir fərdə böyük avantaj qazandırır.
Əsasən sosial şəbəkələr, televiziya və digər informasiya resursları ilə həyatımıza daxil olan yeniliklər haqqında isə fikirlər haçalanıb. Gənc nəslin təmsilçiləri fərqli cəmiyyətlərin Azərbaycan mental düşüncəsinə yad olmayan təcrübəsinin sürətlə məişətimizə gəlməsinə tərəfdar olduqlarını bildirsələr də, orta nəsli təmsil edənlər üzdə cəlbedici görünən bu təcrübələrin ailə institutuna xələl gətirdiyini düşündüklərini bildiriblər. Toplantı iştirakçıları bildiriblər ki, belə dəyirmi masaların keçirilməsi həm maarifləndirmə, həm də cəmiyyətin müxtəlif təbəqələri arasında mübahisələrin sağlam məcraya yönəldilməsi üçün son dərəcə vacibdir.
