Bakıda yerləşən “Green City Resort & Residence” kompleksinə daxil olan “Sunrise by Green City” hovuz məkanı sosial şəbəkələrdə müştəri narazılığı ilə gündəmə gəlib.
AzPost xəbər verir ki, ziyarətçilərdən biri istirahət zamanı qarşılaşdığı qeyri-şəffaf ödəniş təcrübəsini ictimailəşdirib və obyektin xidmətindən ciddi narazılıq ifadə edib.
Müştərinin sözlərinə görə, ərazi daxilində bütün ödənişlər qolbaq vasitəsilə həyata keçirilir və bu qolbaqlara əvvəlcədən vəsait yüklənir. Onlar cəmi otuz beş manatlıq sifariş versələr də, ödənişi birbaşa özləri edə bilməyiblər. Qolbağı ofisiant apararaq ödənişi özü edib və dəfələrlə geri qaytarmaqdan imtina edib.
İstirahət başa çatdıqda isə sürprizlə qarşılaşıblar – bildirilib ki, əlavə olaraq iyirmi iki manat da qolbaqdan çıxılıb və bu vəsaitin hansı sifarişə getdiyi məlum deyil. Müştəri bu barədə heç bir məlumat verilmədiyini, həmçinin qalan məbləğin də geri qaytarılmadığını deyib.
Məsələnin hüquqi tərəfinə gəldikdə, Azərbaycan Respublikasının “İstehlakçıların hüquqlarının müdafiəsi haqqında” Qanununa əsasən, müştəriyə göstərilən xidmətin şərtləri əvvəlcədən açıq və dəqiq izah edilməlidir. Müştərinin xəbəri və razılığı olmadan hesabından əlavə vəsait tutulması qanun pozuntusu hesab olunur.
Eyni zamanda, “Nağdsız hesablaşmalar haqqında” Qanuna görə, elektron ödəniş sistemlərində şəffaflıq və müştərinin məlumatlandırılması əsas prinsipdir. Belə hallarda vətəndaşlar aidiyyəti üzrə İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinə şikayət edə bilər.
