depressiya
Son illərdə depressiya və stress halları dünyada sürətlə artır. AzPost xəbər verir ki, psixoloqlar qidalanmanın insan əhvalına təsirini təsdiqləyib. Xüsusilə bəzi təbii qidalar depressiya riskini azaldır və ruh halını yaxşılaşdırır.
Tədqiqatlara görə, somon balığı və digər omega-3 zəngin balıq növləri beyində serotonin və dopamin hormonlarının səviyyəsini yüksəldir. Bu hormonlar isə xoşbəxtlik və rahatlıq hissini təmin edir. Eyni təsirə malik digər məhsul isə qara şokoladdır. Tünd şokolad beyin funksiyalarını aktivləşdirir və stressi azaldır.
Yaşıl yarpaqlı tərəvəzlər də psixi sağlamlıq üçün əvəzolunmaz hesab olunur. Fol turşusu və B qrupu vitaminləri əsəb sistemini qoruyur və sinir gərginliyinin qarşısını alır. Avokado və banan isə yüksək maqnezium tərkibi sayəsində əsəbləri sakitləşdirir.
Qoz, badam kimi çərəzlər də beyin fəaliyyətini dəstəkləyir və gərginliyi azaldır. Tərkibindəki E vitamini və antioksidantlar stress hormonunun səviyyəsini aşağı salır. Gündə bir ovuc çərəz qəbul etmək əhval-ruhiyyəni stabilləşdirə bilər.
Bundan əlavə, qatıq və digər probiotik tərkibli qidalar bağırsaq mikroflorasını yaxşılaşdırır, bu da beyinə müsbət siqnallar göndərir. Mütəxəssislər gün ərzində bu qidalardan mütəmadi istifadə etməyi tövsiyə edir.
