Sel
Hindistanın şimal-şərqində baş verən güclü leysan yağışları və Tista çayının daşması nəticəsində azı 36 nəfər həyatını itirib. AzPost bildirir ki, The Hindu nəşrinin yaydığı məlumata görə, daşqınlar bölgədə minlərlə insanın həyatına ciddi təsir göstərib.
Rəsmi məlumatlara əsasən, təbii fəlakət nəticəsində 550 min insan zərər çəkib və bir çox yaşayış məntəqələri su altında qalıb. Leysan yağışlarının yaratdığı təhlükəli şəraitə görə, bölgədə 1500-dən çox turist daşqın və torpaq sürüşmələri səbəbindən məhdud ərazilərdə qalıb.
Mint qəzetinin xəbərinə görə, xüsusilə şimal bölgələrində yerləşən su elektrik stansiyalarının yaxınlığında vəziyyət daha kritikdir. Əvvəllər azı 30 nəfərin öldüyü bildirilmişdi, lakin son məlumatlar fəlakətin daha ağır olduğunu ortaya qoyub.
Hazırda regionda fövqəladə hallar xidməti və ordu bölmələri təxliyə və yardım işlərini davam etdirir. Hava şəraiti isə hələ də təhlükəli olaraq qalır və yeni yağışların gözlənildiyi bildirilir.
Qeyd edək ki, Hindistanda musson mövsümü hər il on minlərlə insanın həyatını çətinləşdirən təbii fəlakətlərlə müşayiət olunur.
