Pələng
Hindistanda pələnglər 17 gündə 11 nəfəri parçaladı.
Hindistanın Maharaştra ştatında yerləşən Tadoba-Andhari Vəhşi Təbiət Qoruğunda pələnglər ardıcıl hücumlarla 17 gün ərzində 11 nəfəri öldürüb. İnsidentlər Çandrapur bölgəsində qeydə alınıb.
AzPost-un Free Press Journal-a istinadla məlumatına görə, son günlər əraziyə yaxın meşəliklərdə pələng hücumları kəskin şəkildə artıb. Nəşr bildirir ki, son hadisədə yerli qadın əri və dostları ilə birlikdə bambuk yığarkən vəhşi heyvanın hücumuna məruz qalıb. Pələng qadını parçalayıb və hadisə yerində öldürüb.
Bundan bir qədər sonra isə eyni ərazidə daha bir hücum baş verib. Bu dəfə pələngin qurbanı kişi olub. Yerli sakinlərin sözlərinə görə, meşə ətrafında vəziyyət kritik olaraq qalır və insanlar qorxu içində yaşayır.
Maharaştra Meşə Departamenti baş verən hadisələrlə bağlı araşdırmalara başlayıb. Qoruq ərazisində təhlükəsizlik tədbirləri gücləndirilsə də, vəhşi heyvanların yaşayış məntəqələrinə yaxınlaşması davam edir.
Qeyd edək ki, Tadoba-Andhari ölkənin ən qədim milli parklarından biri hesab olunur və burada pələnglərin sayı çoxdur. Mütəxəssislər ehtimal edir ki, ərazidəki mövsümi dəyişikliklər və qida qıtlığı pələnglərin yaşayış məntəqələrinə gəlməsinə səbəb olub.
Rəsmi qurumlar yerli əhaliyə meşəyə girməmək barədə xəbərdarlıq etsə də, bəziləri məcburiyyət qarşısında bu qaydalara əməl edə bilmir.
