Hörmüz boğazının bloklanması bu ilin ikinci yarısında və 2027-ci ildə dünya üzrə ərzaq istehsalının və tədarükünün azalmasına səbəb ola bilər.
Azpost.info-nun məlumatına görə, bu barədə BMT-nin Ərzaq və Kənd Təsərrüfatı Təşkilatının (FAO) Rusiya ilə əlaqələr üzrə bölməsinin rəhbəri Oleq Kobyakov “RİA Novosti”yə müsahibəsində bildirib.
Onun sözlərinə görə, böhranın nəticələri yalnız hazırkı ərzaq qiymətlərinə təsir etməyəcək, növbəti mövsümlərin məhsuldarlığında da özünü göstərəcək.
“Bu, 2026-cı ilin ikinci yarısında və 2027-ci ildə ərzaq istehsalının və tədarükünün azalmasına gətirib çıxaracaq”, – Kobyakov deyib.
FAO rəsmisi bildirib ki, kənd təsərrüfatında işlər müəyyən əkin təqviminə uyğun aparılır və bu müddətləri sonradan dəyişmək mümkün deyil. Onun sözlərinə görə, hətta bir neçə həftəlik gecikmə fermerlərin gübrələrdən istifadəsini azaltmasına və ya ümumiyyətlə gübrə tətbiqindən imtina etməsinə səbəb ola bilər.
Bu isə sonrakı hava və digər şərtlərdən asılı olmayaraq məhsuldarlığın aşağı düşməsinə gətirib çıxarır.
“FAO-nun apardığı təhlillərə əsasən, böhranın yaratdığı bir-biri ilə əlaqəli şoklar ərzaq qiymətlərinin artmasına və artıq uzunmüddətli və ya kəskin ərzaq böhranlarının təsirinə məruz qalan ölkə və regionlarda aclığın daha da güclənməsinə səbəb ola bilər”, – Kobyakov vurğulayıb.
Hörmüz böhranı niyə ərzağa təsir edir?
Hörmüz boğazından keçən ticarət axınının ciddi şəkildə məhdudlaşması ilk növbədə enerji bazarına təsir edir. Boğaz dünya bazarına neft, neft məhsulları və mayeləşdirilmiş təbii qazın daşınması üçün əsas marşrutlardan biridir.
Yanacağın bahalaşması isə kənd təsərrüfatının maya dəyərini artırır. Bundan əlavə, gübrələrin və digər kənd təsərrüfatı məhsullarının daşınmasında yaranan problemlər fermerlərin əkin və istehsal prosesinə təsir göstərə bilər.
Nəticədə enerji böhranı tədricən ərzaq böhranına çevrilə bilər.
ABŞ və İsrail fevralın 28-də İrandakı obyektlərə zərbələr endirməyə başlayıb. İran tərəfi də buna cavab olaraq zərbələr endirib. İyunun ortalarında Tehran və Vaşinqton hərbi əməliyyatların dayandırılması barədə memorandum imzalasa da, sonradan tərəflər yenidən qarşılıqlı zərbələr həyata keçiriblər. Hazırda münaqişə tam həll olunmayıb.
Münaqişənin kəskinləşməsi nəticəsində Hörmüz boğazından gəmiçilik faktiki olaraq dayanıb. Bu vəziyyət dünya enerji bazarında qiymətlərin yüksəlməsinə səbəb olub.
FAO-nun xəbərdarlığı isə göstərir ki, böhranın nəticələri yalnız yanacaq qiymətləri ilə məhdudlaşmaya, yaxın aylarda ərzaq bazarında da hiss oluna bilər.
S.Abdulla
