İnsan beyni kainatdakı ən mürəkkəb strukturlardan biri hesab olunur. Təxminən 1,3–1,4 kiloqram çəkisi olan bu orqan bədənimizin bütün fəaliyyətini idarə edir.
Alimlərin araşdırmalarına görə beyində təxminən 86 milyard neyron mövcuddur.
Neyronlar arasında trilyonlarla əlaqə formalaşa bilir. Beyin bədən çəkisinin cəmi 2 faizini təşkil etsə də, enerjinin təxminən 20 faizini istifadə edir. İnsan beyni yuxu zamanı belə aktiv fəaliyyət göstərir.
Ən maraqlı faktlardan biri beynin dəyişmək qabiliyyətidir. “Neyroplastiklik” adlanan bu xüsusiyyət sayəsində insan yeni bacarıqlar öyrənə, zədələrdən sonra müəyyən funksiyaları bərpa edə bilir.
Harvard Universitetində aparılan tədqiqatlar göstərib ki, müntəzəm oxumaq, yeni dillər öyrənmək və musiqi ilə məşğul olmaq beynin fəaliyyətini gücləndirir. Mütəxəssislər hesab edirlər ki, zehni aktivlik yaşlandıqca yaddaş problemlərinin yaranma riskini azalda bilər.
