ABŞ Prezidenti Donald Tramp İranla əldə olunmuş razılaşmanın sabah imzalanmasının planlaşdırıldığını və bunun ardınca Hörmüz boğazının tam açılacağını bildirib.
Tramp bu barədə “Truth Social” hesabında yazıb.
ABŞ lideri keçmiş prezident Barak Obamanın İranla nüvə sazişini tənqid edərək, həmin sənədin Tehrana nüvə silahı əldə etmək üçün imkan yaratdığını iddia edib.
Tramp bildirib ki, onun administrasiyasının əldə etdiyi yeni razılaşma İranın nüvə silahına malik olmamasını nəzərdə tutur.
“İran artıq nüvə silahı istəmir və onu əldə etmək üçün araşdırma, inkişaf və ya hər hansı satınalma fəaliyyəti də həyata keçirməyəcək”, – deyə o qeyd edib.
ABŞ prezidenti vurğulayıb ki, saziş imzalandıqdan dərhal sonra Hörmüz boğazı bütün gəmilər üçün açıq olacaq.
Tramp həmçinin bildirib ki, gələcəkdə vəziyyət sabitləşdikdən sonra ABŞ İranın dağlıq ərazilərində yerləşən və ABŞ zərbələri nəticəsində dağıdılmış nüvə obyektlərinin qalıqlarını araşdıracaq.
“İran və bütövlükdə Yaxın Şərqlə işləməyi səbirsizliklə gözləyirik”, – deyə Tramp əlavə edib.
ABŞ prezidenti qeyd edib ki, prosesin tez və problemsiz yekunlaşacağına ümid edir, lakin bunun baş verməyəcəyi halda Vaşinqtonun alternativ variantlarının da olduğunu vurğulayıb.
