Kapital Bank
Kapital Bankın müştərisi Heydər Məmmədli sosial şəbəkələrdə bankın xidmətindən narazılığını ifadə edib.
AzPost bildirir ki, vətəndaş mobil tətbiq vasitəsilə taksi sifariş verdiyini, lakin taksi tapılmadığı üçün əməliyyatı ləğv etdiyini yazıb. Nəticədə kart balansından 6 manat 30 qəpik məbləğində pul çıxılıb.
Heydər Məmmədli bildirib ki, taksi şirkəti ödənişi geri qaytardığını təsdiqləyib, lakin Kapital Bank vəsaitin hələ də “gözləmədə” olduğunu deyərək, qaytarılma müddətini otuz gün kimi göstərir. “Bu hansı dünya praktikasına əsaslanır? Bank üçün 6 manat böyük məbləğ deyil, müştərini niyə bu qədər gözlədirlər?”, – deyə şikayətçi bildirib . O, bankın bu cür vəsaitləri müvəqqəti istifadə etməklə əlavə gəlir əldə etdiyini iddia edir.
Məsələ ilə bağlı Kapital Bank Heydər Məmmədliyə cavab verib. Bankdan bildirilib ki, ödəniş gözləmədə olduğu müddətdə onun təsdiqlənməsi 30 təqvim günü ərzində baş verə bilər. Əgər geri ödənişin həyata keçirildiyini təsdiqləyən sənəd təqdim olunarsa, 3 iş günü ərzində araşdırma aparıla bilər.
Təsdiqedici sənəddə əməliyyatın tarixi, təsdiq kodu (Approval Code), məbləği, RRN kodu və satışı həyata keçirən təşkilatın adı mütləq qeyd olunmalıdır. Bank əlavə olaraq vətəndaşların anlayışına ümid etdiyini də bildirib.
