Bank kartları ilə bağlı problemlər artır
Azərbaycanda kartdan karta köçürmələr, ödəniş kartları və elektron pul hesablarının sayı üzrə yeni limitlərin tətbiqi nəzərdə tutulur.
Azpost.info Cashless.az saytına istinadən xəbər verir ki, hazırlanmış “card-to-card” tipli ödəniş əməliyyatlarına dair şərtlər Azərbaycan Banklar Assosiasiyasının və Azərbaycan Fintex Assosiasiyasının üzv təşkilatlarına təqdim edilib.
Məlumata əsasən, yeni şərtlər rəqəmsal ödənişlər sahəsində fırıldaqçılıq hallarına qarşı mübarizənin gücləndirilməsi, vergi öhdəliklərindən yayınma və qanunsuz mərc oyunları ilə bağlı mümkün sui-istifadə hallarının qarşısının alınması, eləcə də ödəniş əməliyyatlarında şəffaflığın artırılması məqsədi daşıyır.
Təqdim edilən şərtlərə əsasən, karta mədaxil və kartdan köçürmə əməliyyatları üzrə gündəlik əməliyyat sayı 5 ilə məhdudlaşdırılır. Hər iki əməliyyat növü üzrə günlük məbləğ limiti tətbiq olunmur. Aylıq məbləğ limiti isə həm karta mədaxil, həm də kartdan köçürmə üzrə 20 min manat müəyyən edilir.
Bundan başqa, müştərinin öz kartları arasında, yaxın qohumların kartlarından mədaxil və ya yaxın qohumların kartlarına köçürmə əməliyyatları bu limitlərdən istisna edilə bilər. Sahibkarlıq hesabına bağlı kartlardan mədaxil və ya belə kartlara köçürmə də limitlərdən kənar saxlanıla biləcək.
Şərtlərdə həmçinin ödəniş kartlarının və elektron cüzdanların sayına dair limitlər də əksini tapıb. Milli valyutada əməkhaqqı, pensiya və digər sosial müavinətlər üçün nəzərdə tutulmuş kartlar, depozit kartları və onlayn ödənişlər üçün nəzərdə tutulmuş kartlar istisna olmaqla, hər məhsul üzrə 1 kart limiti müəyyən edilir. Hər bir xarici valyuta üzrə də hər məhsula 1 kart limiti tətbiq olunacaq.
Elektron cüzdanlar üzrə isə milli valyutada 2 elektron cüzdan, hər bir xarici valyuta üzrə 1 elektron cüzdan limiti nəzərdə tutulur.
Kartdan karta köçürmələrdə təyinatın qeyd olunması da tələb ediləcək. Bunun üçün “Mal alışı”, “Xidmətlərin alışı” və “Şəxsi və digər köçürmələr” olmaqla seçim siyahısı yaradılmalıdır. “Şəxsi və digər köçürmələr” seçildikdə minimum 10 simvoldan ibarət məcburi doldurulan xana olmalıdır. Köçürmə yalnız təyinatla bağlı şərtlər yerinə yetirildikdən sonra aktivləşməlidir.
