Laçın şəhərində “MDB-nin Mədəniyyət Paytaxtı – 2025”in bağlanış mərasimi çərçivəsində “MDB Ölkələrinin Müasir Kino İstehsalının İnkişafı” adlı dəyirmi masa təşkil olunub.
APA-nın Laçına ezam olunmuş müxbirinin məlumatına görə, tədbirdə çıxış edən Laçın şəhərində Azərbaycan Prezidentinin xüsusi nümayəndəsi Məsim Məmmədov bildirib ki, Laçında kino sənayesinin inkişafı üçün addımlar atılır.
“Şəhərdə ilk növbədə kinoteatr və kinopavilyonu bərpa etmişik. Eləcə də Laçında konqres-konsert zalının tikintisini planlaşdırırıq. Ümid edirəm ki, gələcək əməkdaşlıq çərçivəsində kino sənayesinə sərmayə qoyulacaq və bunun faydasını görəcəyik”, – deyə o bildirib.
Daha sonra çıxış edən mədəniyyət nazirinin müavini Fərid Cəfərov qeyd edib ki, 34 yerli kino istehsalı şirkətinə 20 milyon manatdan çox dövlət dəstəyi ayrılıb: “Bu dəstək Azərbaycanda kino sənayesinin gələcək inkişafına kapital qoyuluşudur”.
“Qırğızfilm” Milli kinostudiyasının aparıcı mütəxəssisi Rabia Mirlanova isə qeyd edib ki, Kino humanitar əməkdaşlığın güclü vasitələrindən biridir.
“Kino elə bir yatırım sahəsidir ki, bu, əsrlərlə qala bilər. Bu da o deməkdir ki, kino ölkələr arasında mədəni münasibətlərin inkişafı üçün unikal vasitədir”, – deyə o bildirib.
Özbəkistan Kinematoqrafiya Agentliyinin Ekspert Komissiyasının üzvü, Özbəkistan Film İstehsalçıları Birliyinin sədri Kuçkarov Mannob isə kino vasitəsilə ortaq mədəniyyət, tarix, sənət və ədəbiyyatı geniş şəkildə təbliğ etməyin mümkün olduğunu bildirib.
Dəyirmi masa xarici qonaqların da iştirakı ilə müasir kinonun inkişafı ilə bağlı fikir mübadiləsi ilə davam edib.
