Məlhəm
Paytaxtda yerləşən “Məlhəm Beynəlxalq Hospital” barədə sosial şəbəkələrdə narazılıq yayımlanıb. AzPost bildirir ki, üç uşaq anası olan Nigar Salayeva bildirib ki, 22 iyul tarixində səhər saat 09:30-a nevroloq Sahilə Ələkbərovaya əkiz övladları ilə birlikdə qəbul üçün yazılıb.
Pasiyentin sözlərinə görə, saat 09:15-də ödəniş edib və həkimi gözləməyə başlayıb. Lakin təyin olunmuş vaxt keçsə də, həkim görünməyib. Onun yazılı müraciətinə isə sadəcə “yoldayam” cavabı verilib. Bundan sonra isə həkim nə zənglərə cavab verib, nə də geri dönüş edib.
Narazı ana qeydiyyat şöbəsinə yaxınlaşaraq ödənişin geri qaytarılmasını tələb edib. Şikayət üçün yönləndirildiyi otaqda isə məsul şəxsin hələ gəlmədiyi bildirilib. Nigar Salayeva bildirib ki, bu müddətdə iki körpə ilə birlikdə klinikada əlavə 2 saat gözləmək məcburiyyətində qalıb.
Yalnız 2 saatdan sonra klinika rəhbərliyindən bir şəxs yaxınlaşaraq, həkimin 20 dəqiqəyə gələcəyini deyib və “əgər gözləyə bilmirsinizsə, pulu geri qaytaraq” təklifi irəli sürüb.
Pasiyent bildirib ki, bu cür yanaşma nə peşəkarlığa, nə də “beynəlxalq” adını daşıyan bir tibb müəssisəsinin standartlarına uyğun deyil. O, həkim punktuallığının və pasiyentə hörmətin vacibliyini vurğulayıb.
Məsələ ilə bağlı qarşı tərəf – “Məlhəm Beynəlxalq Hospital”ın rəsmi mövqe açıqlayarsa xəbər yenilənəcək.
