Əhali
Azərbaycanda minimum əmək haqqı 2025-ci ilin əvvəlindən etibarən 400 manat səviyyəsində müəyyən olunub. AzPost bildirir ki, bu göstərici rəsmi qərarla qüvvəyə minsə də, real həyat şərtləri fonunda bu məbləğlə dolanmaq mümkündürmü sualı aktuallığını qoruyur.
Hazırkı iqtisadi vəziyyətdə 400 manatlıq aylıq gəlir ilə vətəndaş nə qədər yaşayış xərclərini qarşılaya bilər? Bu sualı cavablandırmaq üçün 2025-ci ilin ərzaq qiymətləri və kommunal xidmət haqlarına əsaslanan sadə təhlilə nəzər salaq.
Kommunal xidmətlər nə qədər tutur?
Aylıq ortalama istehlak göstəricilərinə əsasən:
-
Elektrik enerjisi: 150 kVt/saat × 8,4 qəpik = təxminən 12,60 manat
-
Təbii qaz: 100 m³ × 12,5 qəpik = 12,50 manat
Bu iki əsas kommunal xidmət üçün bir vətəndaşın aylıq ödənişi təxminən 25 manat təşkil edir. İstilik, su və digər xidmətlər əlavə olunduqda bu rəqəm daha da arta bilər.
Ərzaq səbəti nə qədər başa gəlir?
2025-ci ilin may ayına uyğun təxmini bazar qiymətlərinə əsasən, aşağıdakı sadə ərzaq səbəti tərtib olunub:
-
Çörək (30 ədəd) – 12 manat
-
Süd (30 litr) – 45 manat
-
Yumurta (30 ədəd) – 6 manat
-
Kartof (5 kq) – 8 manat
-
Pomidor, düyü, çay və digər əsas məhsullar – 14 manat
Bu səbətə daxil olan məhsullar gündəlik kalori tələbatını çətinliklə qarşılayır. Ərzaq xərcləri ümumilikdə təxminən 85 manat təşkil edir. Nəzərə alsaq ki, burada ət, yağ, meyvə, balıq və vitaminli məhsullar yer almır, bu siyahı yalnız minimum səviyyədə qidalanma üçün nəzərdə tutulub.
Yerdə nə qalır?
Əgər minimum əmək haqqı ilə yaşayışa baxsaq:
-
Əmək haqqı – 400 manat
-
Ərzaq – 85 manat
-
Kommunal – 25 manat
-
Qalan məbləğ – təxminən 290 manat
Bu məbləğdən mənzil kirayəsi, geyim, nəqliyyat, səhiyyə və digər məcburi xərclər qarşılanmalıdır. Paytaxtda və iri şəhərlərdə mənzil kirayəsinin minimum 250–300 manat civarında olduğunu nəzərə alsaq, bu büdcənin kifayət etmədiyi açıq görünür.
Araşdırma göstərir ki, 400 manatlıq minimum əmək haqqı yalnız bazar səviyyəli qiymətlərə malik rayon və kəndlərdə, o da ailədə digər gəlir mənbəyi olduqda dolanışığa kifayət edə bilər. Lakin Bakıda və digər iri şəhərlərdə tək yaşayan vətəndaş üçün bu məbləğlə ayı başa vurmaq çətin görünür.
