Həbs
Rusiya Federasiyasının Kaluqa vilayətində polis rəisinin müavini və cinayət axtarış idarəsinin rəisi qanunsuz miqrasiya işi ilə bağlı həbs olunub. AzPost MK-ya istinadla xəbər verir ki, onlar Rusiya ərazisində 50 minə yaxın miqrantı qanunsuz olaraq leqallaşdırmaqda ittiham edilir.
Rusiya Federasiyası İstintaq Komitəsinin bölgə üzrə mətbuat xidmətinin məlumatına görə, iki yüksək rütbəli polis əməkdaşı iki il ərzində əcnəbilərin rus dilindən və Rusiya qanunvericiliyinin əsaslarından imtahan verməsini saxtalaşdıraraq, onlara iş icazəsi, müvəqqəti və daimi qeydiyyat, eləcə də digər sənəd prosedurlarını qondarma şəkildə verib. Bu miqrantlar əldə etdikləri sənədlərlə ölkənin müxtəlif bölgələrində yerləşdiriliblər.
Hazırda şübhəlilər Rusiya Federasiyası Cinayət Məcəlləsinin 322.1-ci maddəsinin 3-cü hissəsi (“Xarici vətəndaşların Rusiya Federasiyasında qanunsuz qalmasının təşkili”) və 291-ci maddəsinin 3-cü hissəsi (“Rüşvət vermə”) ilə ittiham olunurlar.
Cinayət işi üzrə ümumilikdə 5 nəfərin iştirakı müəyyən edilib. Qanunsuz leqallaşdırılan miqrantların məlumatları toplanır, onların barmaq izləri götürülərək vətənlərinə deportasiyası həyata keçiriləcək.
