Həbs
Beynəlxalq axtarışa verilmiş Azərbaycan vətəndaşı Süleymanov Hidayət Nemət oğlu Monteneqroda saxlanılaraq Azərbaycana ekstradisiya edilib.
AZPOST xəbər verir ki, bu barədə Ədliyyə Nazirliyi məlumat yayıb.
Bildirilib ki, cinayət törətməkdə ittiham olunan və beynəlxalq axtarışa verilmiş şəxslərin tutularaq Azərbaycana gətirilməsi istiqamətində xarici ölkələrin aidiyyəti qurumları ilə əməkdaşlıq tədbirləri davam etdirilir.
Məlumata görə, İnterpolun Azərbaycan Respublikasındakı Milli Mərkəzi Bürosu tərəfindən beynəlxalq axtarışa verilən və yeri Monteneqroda müəyyən edilən Hidayət Süleymanov iyulun 29-da ölkəyə ekstradisiya olunub.
İstintaq materiallarına əsasən, o, 2024-cü ildə tamah niyyəti ilə etibardan sui-istifadə və aldatma yolu ilə zərərçəkmiş şəxsə müxtəlif vaxtlarda yalan vədlər verərək xeyli miqdarda maddi ziyan vurmaqla dələduzluq etməkdə təqsirləndirilir. Ona Azərbaycan Respublikası Cinayət Məcəlləsinin 178.2.4-cü maddəsi (xeyli miqdarda ziyan vurmaqla dələduzluq) üzrə ittiham irəli sürülüb.
Baş Prokurorluğun ekstradisiya sorğusu və aparılan danışıqlardan sonra Monteneqro tərəfi Hidayət Süleymanovun Azərbaycana təhvil verilməsinə razılıq verib.
Ədliyyə Nazirliyinin məlumatına görə, o, Nazirliyin Beynəlxalq əməkdaşlıq baş idarəsinin və Penitensiar xidmətin əməkdaşları tərəfindən Monteneqronun Tivat şəhərindən Azərbaycana gətirilib.
Məhkəmənin qərarına əsasən, Hidayət Süleymanov barəsində seçilmiş həbs qətimkan tədbiri icra olunaraq o, istintaq təcridxanasına yerləşdirilib.
Ədliyyə Nazirliyi bildirib ki, beynəlxalq axtarışda olan şəxslərin ölkəyə ekstradisiyası istiqamətində zəruri tədbirlər davam etdirilir.
