Xəstəxana
Mütəxəssislər hesab edir ki, sürətlə dəyişən hava şəraiti insan sağlamlığına təsirsiz ötüşmür. AzPost xəbər verir ki, həkim Olqa Ulanikina mövsümlərin kəskin dəyişməsi zamanı orqanizmi qorumaq üçün əsas məsləhətlərini bölüşüb.
Onun sözlərinə görə, insan atmosfer təzyiqinə və ya havadakı buludlara təsir edə bilməsə də, öz həyat tərzini idarə etmək gücünə malikdir. Bu baxımdan düzgün yuxu, balanslı qidalanma və fiziki aktivlik orqanizmin xarici təsirlərə qarşı müqavimətini gücləndirir.
Həkim ilk növbədə keyfiyyətli istirahətə diqqət yetirməyi tövsiyə edir. Yuxunun yeddi saatdan az olmaması və hər gün eyni vaxtda yatmaq-vurmağın vacibliyini vurğulayan Ulanikina qeyd edir ki, qaranlıq, sakit və sərin mühitdə yatmaq immuniteti möhkəmləndirir. Əks halda, orqanizm infeksiyalara daha tez yoluxur və bərpa prosesi çətinləşir.
Qidalanmada isə xüsusilə zülal, C və D vitaminləri, sink və omeqa-3 yağ turşularına üstünlük verilməlidir. Bu maddələr toxumaların bərpasına, immunitetin möhkəmlənməsinə və xroniki xəstəliklərin kəskinləşməsinin qarşısının alınmasına kömək edir. Soyuq havalarda isti içkilər, tərəvəz və meyvələrin rasionda artırılması, fəsadlara səbəb ola biləcək fastfud və şəkərin isə azaldılması tövsiyə olunur.
Mütəxəssis həmçinin fiziki aktivliyin əhəmiyyətinə diqqət çəkib. Onun fikrincə, açıq havada hərəkət etmək həm stress hormonlarını azaltmağa, həm də sinir və qan-damar sisteminin işini sabitləşdirməyə kömək edir. Bu zaman hava şəraitinə uyğun geyinmək vacibdir, çünki həm soyuqlama, həm də həddindən artıq isinmə orqanizmə ziyan vurur.
