Dövlət Dumasının sədri müharibə zamanı Rusiyanı tərk edib sonra qayıdanları işə götürməməyə çağırıb.
AzPost bildirir ki, Duma sədri bununla bağlı açıqlama verib. Vyaçeslav Volodinin sözlərinə görə, “ölkəni müdafiə etmək” istəməyən, Ukraynaya dəstək verən gedən ruslar “vətənlərindən imtina ediblər”.
Onun sözlərinə görə, belə şəxslərin Rusiyanın dövlət qurumlarında və ya dövlət şirkətlərində işləməsinə icazə verilməməsi ilə bağlı çoxsaylı müraciətlər var.
“Mən həmkarlarımın əksəriyyətinin mövqeyini ifadə edəcəyəm – biz də sizinlə eyni fikirdəyik. Vətəninə xəyanət etmiş, yaramaz əməllər törətmiş şəxs dövlət və ya bələdiyyə işçisi ola bilməz, dövlət şirkətlərində işləyə bilməz”, – Volodin Teleqram kanalında yazır.
O, özəl qurumları da bu barədə düşünməyə çağırıb:“Bu şəxsləri işə götürməzdən əvvəl başa düşmək lazımdır ki, insan nə qədər istedadlı olsa da, ata-anasını atıb, vətənə xəyanət edib. Bu o deməkdir ki, sabah daha bir çirkin əmələ əl atacaq”.
