Yaxın Şərqdə dəniz nəqliyyatına qarşı hücumların daha da genişlənməsi dünya neft bazarında ciddi bahalaşmaya səbəb ola bilər. ABŞ-nin aparıcı investisiya banklarından biri olan “Goldman Sachs” hesab edir ki, belə bir vəziyyətdə “Brent” markalı neftin qiyməti bir barel üçün 120 dollara yüksələ bilər.
Bankın ekspertləri geosiyasi gərginliyin enerji bazarlarına təsirindən yararlanmaq istəyən investorların diqqətini təbii qaz və dizel yanacağına yönəldiblər.
“Goldman Sachs”ın analitiklərinə görə, son günlər regionda baş verən hadisələr dəniz daşımalarında problemlərin daha geniş əraziyə yayılması və mövcud pozuntuların dərinləşməsi ehtimalını artırıb. Bank neft bazarı üçün iki fərqli ssenari irəli sürür. Gərginliyin daha da artması halında “Brent”in 120 dollara qədər bahalaşması mümkün hesab edilir. Əksinə, regiondan neft tədarükünün əvvəlki səviyyəyə qayıtması vəziyyətində qiymətin 80 dollara qədər geriləyə biləcəyi proqnozlaşdırılır.
Bank investorlar üçün əsas diqqətin təbii qaz və emal edilmiş neft məhsullarına yönəldilməsini məsləhət görür. Analitiklərin fikrincə, geosiyasi böhranın yaratdığı mümkün təchizat problemləri bu məhsulların bazarında xam neftlə müqayisədə daha ciddi qiymət reaksiyasına səbəb ola bilər.
Yaxın Şərqdə yarım ildən artıqdır davam edən qarşıdurmanın yaratdığı qeyri-müəyyənlik artıq enerji bazarında özünü göstərir. Təbii qaz və neft məhsullarının qiymət artımı xam neftdəki bahalaşmanı geridə qoyub. Xüsusilə sənaye üçün istifadə olunan dizelin qiyməti ilin əvvəlindən iki dəfədən çox yüksəlib.
ABŞ və İran arasında son günlərdə Hörmüz boğazı ətrafında artan gərginlik də neft bazarına təsirsiz ötüşməyib. Bunun nəticəsində xam neftin qiyməti iyul ayından bəri ən yüksək həddə çatıb.
Hazırda “Brent” markalı neftin bir bareli təxminən 96 dollara satılır.
