Pəhriz
Bir çox insan kaloriləri azaltmasına baxmayaraq istədiyi nəticəni əldə edə bilmir. Mütəxəssislər bildirirlər ki, bunun səbəbi təkcə yeyilən qidanın miqdarı deyil, həm də qidalanma vərdişləridir.
Azpost.info-nun məlumatına görə, araşdırmalar göstərir ki, insanlar çox vaxt qəbul etdikləri kalorinin həqiqi miqdarını düzgün hesablamırlar. Xüsusilə qəlyanaltılar, şəkərli içkilər və “kiçik porsiyalar” gündəlik enerji balansını ciddi şəkildə dəyişə bilir.
Dietoloq Sevinc Quliyevanın sözlərinə görə, pəhriz saxlayan insanların ən böyük səhvlərindən biri səhər yeməyini buraxmaqdır: “İnsan səhər yeməyini keçdikdə günün ikinci yarısında daha çox qida qəbul etməyə meylli olur. Bu isə pəhrizin effektivliyini azaldır”, – ekspert bildirib.
Mütəxəssislər həmçinin yuxunun roluna diqqət çəkirlər. ABŞ-da aparılan tədqiqatlar göstərib ki, gecə 6 saatdan az yatan insanlarda iştahanı artıran hormonların səviyyəsi yüksəlir. Bundan əlavə, uzunmüddətli stress də arıqlama prosesinə mane ola bilər. Stress zamanı orqanizmdə kortizol hormonu artır və bu da yağ ehtiyatlarının toplanmasına şərait yaradır.
Ekspertlər hesab edir ki, uğurlu arıqlamanın sirri qısamüddətli sərt pəhrizlərdə deyil, uzunmüddətli sağlam həyat tərzindədir.
