Restoran
Qəbələnin turistik məkanlarından olan Nohurgöldə fəaliyyət göstərən Sahil restorananı ilə bağlı turistlərin şikayətləri yayılıb. Müştərilər bildirirlər ki, restoranda onlara əvvəlcə baha qiymətlərlə tərtib olunmuş menyu təqdim edilir. Qiymətlərlə maraqlandıqda isə “səhvən verilib” bəhanəsi ilə ikinci, daha ucuz menyu gətirilir.
AzPost bildirir ki, şikayətdə deyilir ki, sifariş olunan yeməklər də menyuda göstərildiyi kimi masaya gəlmir. Məsələn, sac yeməyi istənildikdə həmin gün ət və ya tərəvəz olmadıqda, sadəcə mövcud ərzaqlardan hazırlanan qarışıq gətirilir. Yarpaq dolması sifariş edənlərə isə yarpaq olmadıqda sadəcə ət təqdim olunur.
Turistlərin iddiasına görə, “ev kompotu” adı ilə verilən içkilər də əslində mağazadan alınıb qrafinkaya tökülür və bir neçə qat baha qiymətə satılır.
Əlavə narazılıq yekun hesabla bağlıdır. Müştərilər qeyd edirlər ki, əslində sifariş vermədikləri yeməklərin adı hesaba daxil edilir, etiraz olunanda isə “qiyməti eynidir” cavabı verilir. Bundan başqa, hesabda 10 faiz servis haqqı ayrıca göstərilsə də, menyuda bu barədə heç bir məlumat yoxdur.
Şikayətçilər yeməklərin dadının da gözlənilən səviyyədə olmadığını bildirərək turistlərə həmin restoranı seçməməyi tövsiyə edirlər.
Hazırda restoran rəhbərliyinin və aidiyyəti qurumların məsələ ilə bağlı mövqeyi açıqlanmayıb.
