Bələdiyyələr
İqlim dəyişikliyi ilə əlaqədar qlobal istiləşmənin sürətlənməsi dünya iqtisadiyyatı ilə bağlı yeni bədbin proqnozlara yol açıb. Alimlərin hesablamalarına görə, qlobal temperaturun 4 dərəcə (Selsi) artacağı təqdirdə qlobal ümumdaxili məhsul 40 faizə yaxın azalacaq.
Trend xəbər verir ki, bu barədə “Independent” yazır.
Araşdırmanı aparan “New South Wales” universitetinin tədqiqat qrupu, yaranmış vəziyyətlə əlaqədar “çevik karbonsuzlaşdırmanın” təkcə ekoloji imperativ yox, həm də iqtisadi zərurət olduğunu bildirir.
Bundan əvvəlki hesablamalarda qlobal temperatur artımının 2100-cü ilə qədər 4°C-ni keçməyəcəyi təqdirdə qlobal ÜDM-in 11 faizə qədər azalacağı proqnozlaşdırılırdı.
Qlobal ÜDM-in 40 faiz azalması ilə bağlı yeni proqnoz mövcud öhdəliklərin yerinə yetirilmədiyi və dünyada qalıq yanacaqlardan istifadənin artmağa davam etdiyi yüksək emissiya ssenarilərinə əsaslanır.
Birləşmiş Millətlər Təşkilatının Ətraf Mühit Proqramına görə, 2100-cü ilə qədər tam 4°C istiləşmənin qarşısının alınması mümkün olsa da, mövcud iqlim öhdəlikləri tam şəkildə həyata keçirilsə belə, dünya 2,5-2,9°C civarında artıma doğru irəliləyir.
