Dilarə Əliyeva adına Azərbaycan Qadınlarının Hüquqlarının Müdafiə Cəmiyyəti Zaqatalada “Regionlarda “Məişət Zorakılığı” təbliğat kampaniyasının təşkili” adlı layihənin növbəti tədbirini keçirib.
Layihənin donoru Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyidir. Tədbiri açan layihə üzrə təlimçi Dilarə Əfəndiyeva toplantıya qatılan icma üzvlərinə “Məişət zorakılığının qarşısının alınması haqqında” Qanunla bağlı geniş bilgi verib. O, qanunun müddəaları ilə yanaşı işləmə mexanizmləri, vətəndaşların qanundan yararlanmaq üçün atacağı addımlardan danışıb. Çıxışını real faktlar üzərində quran təlimçi bildirib ki, məişət zorakılığı kimi qanunda cinayət kimi təsbit edilən hərəkətlərin bir çoxuna insanlar sıradan hadisə kimi yanaşır və münasibətlərin pozulmasına gətirən bu hərəkətlərin dayandırılması üçün zamanında adıımlar atmırlar. Bu isə problemin dərinləşməsini sürətləndirir. O, vətəndaşları narahatlıq doğuran faktları ictimailəşdirməyə, ailə institutu ilə yanaşı dövlət orqanlarının dəstəyindən yararlanmağa çağırıb. Daha sonra təlimçi seminar iştirakçılarını maraqlandıran suallara cavab verib. Gənc nəslin nümayəndələri bəzi valideynlərin övladlarının təhsil hüququndan yararlanmasına imkan verməməsini məişət zorakılığına misal kimi göstəriblər. Onların fikrincə, xüsusən məktəb bu məsələdə şagirdlərə dəstək olmalıdır. Bəzi icma nümayəndələri isə bildirib ki, ali məktəblərin paytaxtda yerləşməsi, Bakıda həyatın bölgələrlə müqayisədə çox bahalığı, universitetlərdə yataqxanaların olmaması, ailələrdən bir çoxunun isə təhsillə bağlı bu qədər xərcləri daşımaq üçün düzənli gəlirinin yoxluğu belə arzuolunmaz qərarlara gətirib çıxarır. Sonucda həm gənclər təhsil hüququndan yararlana bilmir, ixtisas sahibi olmadıqları üçün karyera imkanlarından məhrum olur, həm də məişət zorakılığı hallarının artması tendesiyası yaranır. Bu səbəbdən icma nümayəndələri ölkədə iqtisadi inkişafın, vətəndaşların rifahının yüksəldilməsini bir çox məsələlər kimi məişət zorakılığının aradan qaldırılmasının əsas açarı kimi gördüklərini vurğulayıblar. Onların fikrincə, kompleks addımlar atılmadan cəmiyyətdə normal münasibətlər sisteminin yaradılması uzun və çətin olacaq.
