Qəza
İstanbulun Bahçelievler rayonunda qeyri-adi qəza baş verib. AzPost xəbər verir ki, hadisə Mimar Sinan küçəsində qeydə alınıb. Saat 16:30 radələrində hərəkətdə olan avtomobilin sürücüsü idarəetməni itirərək park vəziyyətindəki maşına və ona söykənərək dostu ilə söhbət edən şəxsə çırpılıb.
Hadisə şahidlərinin sözlərinə görə, 34 VE 4201 dövlət nömrə nişanlı avtomobilin sürücüsü idarəetməni itirərək öncə 34 NBZ 706 nömrəli park halında olan avtomobilə, daha sonra isə həmin anda arxadaşı ilə söhbət edən E.Y. adlı şəxsi vurub. Ardınca avtomobil 34 MEU 110 nömrəli motosikletə çırpılaraq aşıb.
Qəza nəticəsində E.Y. yerə savrulub və müxtəlif dərəcəli bədən xəsarətləri alıb. Sürücü isə hadisədən yüngül sıyrıqlarla xilas olub. Motosiklet sahibi Ahmet T. isə son anda özünü xilas edə bilib.
Hadisə yerinə dərhal polis, təcili tibbi yardım və yanğınsöndürmə briqadaları cəlb olunub. Yaralı şəxs ilkin tibbi müdaxilədən sonra xəstəxanaya çatdırılıb. Motosiklet sürücüsü Ahmet T. bildirib ki, “Dostum park edilmiş ağ maşına söykənmişdi. Arxadan gələn maşın sürətlə çırpıldı. Dostum 15-20 metr havaya qalxdı. Mən özümü motosikletdən atmasaydım, ayağım altında qala bilərdi”, — deyə hadisə ilə bağlı danışıb.
Qəza nəticəsində küçədə ciddi tıxac yaranıb, avtomobil və motosikletdə maddi zərər qeydə alınıb. Hadisə ilə bağlı araşdırma aparılır.
