Bakıda mağaza sahibi İlkin Kazımov ictimaiyyəti narahat edən ciddi problemi gündəmə gətirib. AzPost xəbər verir ki, sahibkar şəxsi “Facebook” hesabında paylaşdığı məlumatda bildirib ki, mağazasında müştəri post-terminal vasitəsilə nağdsız ödəniş həyata keçirib. Terminal ödənişi təsdiqləsə də, nə qəbz çıxıb, nə də məbləğ gün sonu “Z” hesabatında əks olunub.
İlkin Kazımov qeyd edir ki, yaranmış vəziyyətlə bağlı əvvəlcə ödənişin qəbul olunduğu bank – PASHA Bank ilə əlaqə saxlayıb. Bank nümayəndələri isə məsuliyyət daşımadıqlarını və məsələnin terminal operatoru NBA şirkəti ilə həll olunmalı olduğunu bildiriblər. Lakin NBA şirkəti də məsuliyyətdən yayınaraq sahibkarı yenidən banka yönləndirib.
“Bu halda köçməyən vəsaitin taleyi necə həll olunur? Müştəri ödədiyini düşünür, biz isə o pulu almamışıq” – deyə mağaza sahibi bildirib. O vurğulayıb ki, belə texniki problemlər biznes etibarını və müştəri məmnuniyyətini ciddi şəkildə zədələyir.
Məsələ ilə bağlı iqtisadçı ekspertlər bildirir ki, nağdsız ödəniş zamanı əməliyyat post-terminal tərəfindən təsdiqlənsə də, qəbz çıxmadığı və bank sistemində hesabatda görünmədiyi halda vəsait müvəqqəti bloklanmış və ya texniki problem nəticəsində gecikmə ilə köçürülə bilər. Lakin belə hallarda həm bank, həm də xidmət təminatçısı məsuliyyət daşıyır və problemi birgə həll etməlidirlər.
Sahibkar İ.Kazımov məsələnin ictimai diqqətə çatdırılmasını vacib hesab edərək, aidiyyəti qurumlardan bu kimi halların qarşısının alınması üçün tədbir görməyi tələb edir. O, bildirir ki, “Müştəriyə – ödədin, amma pul bizə gəlmədi – demək nə qədər peşəkar və etibarlı yanaşmadır?”
Yazıda adı çəkilən tərərflərin mövqeyi olarda məlumat yenilənəcək.
