Ermənistanın Baş naziri Paşinyan Qarabağda qondarma rejimin ləğvi prosesinin 2016-cı ildə Azərbaycanla aparılmış danışıqlar prosesində başlandığını bildirib.
Azpost.info-nun məlumatına görə, Paşinyan bu barədə “Vətəndaş sazişi” Partiyasının təşəbbüs qrupunun İcevanda keçirilən iclasında danışıb.
“Dağlıq Qarabağ Respublikası”nın ləğvi 2016-cı ilin avqustunda aparılmış danışıqlar prosesində baş verən substantiv dəyişikliklər nəticəsində qaçılmaz oldu”-deyə Paşinyan vurğulayıb.
“Bizə miras qalmış danışıqlar prosesində qaçılmaz yol təkcə ərazilərin verilməsi deyil, həm də Qarabağda yaradılmış dövlət nizamının ləğvi idi. Bu barədə birinci dəfə istintaq komissiyasında çıxışım zamanı çox ehtiyatla danışdım, ikinci dəfə daha açıq danışdım, bu yaxınlarda vətəndaşların suallarını cavablandırdım. İndi Qarabağdakı hadisələrdən sonra daha sərbəst danışa bilirəm”, – Paşinyan bildirib.
Paşinyan qeyd edib ki, bu mövzu heç vaxt müzakirə olunmayıb. Çünki müzakirə olunsaydı, o zaman xalqa 30 il ərzində ölkənin resursların mənasızcasına həll olunmayacaq problemə sərf edildiyini demək lazım idi: “Niyə bu həll olunmaz oldu? Çünki BMT Təhlükəsizlik Şurasının qətnamələri var idi. İndi bizi çox ittiham edirlər. Deyirlər ki, əvvəldən Qarabağın öz müqəddəratını təyinetmə məsələsi ilə məşğul olacağımızı vəd verdik, amma bunu etmədik. Problem ondadır ki, biz “öz müqəddəratını təyinetmə hüququnun” nə olduğunu anlamağa çalışdıq. 6 dekabr 1996-cı ildə Lissabon sammitində bizə dedilər ki, öz müqəddəratını təyinetmə hüququnun ən yüksək təzahürü Azərbaycan dövləti daxilində muxtar status ola bilər. Biz bu məntiqlə getdik. Bizim günahımız və ən böyük səhvimiz odur ki, 44 günlük müharibədən sonra xalqımızla bu mövzularda danışmağa başladıq”.
Paşinyan əlavə edib ki, bəzi qüvvələr Ermənistanda dövlət qurulmaması üçün Qarabağ məsələsindən istifadə edib.
Azpost.info
