ABŞ Çinin dövlət şirkətlərindən Rusiyaya yardımla bağlı sübutlar toplayıb və Pekinə təqdim edib.
Azpost.info xəbər verir ki, bu barədə “Bloomberg” məlumatlı mənbələrə istinadən yazıb.
“Bloomberg” mənbələri Vaşinqtonun Rusiya yardımı ilə konkret nə demək istədiyini açıqlamayıblar. Sadəcə qeyd ediblər ki, söhbət öldürücü olmayan hərbi texnika və iqtisadi dəstəkdən gedir.
Co Bayden administrasiyası rəsmi Pekinin bu şirkətlərin hərəkətlərindən xəbərdar olub-olmadığını öyrənməyə çalışır. ABŞ hesab edir ki, Pekinin dəstəyi Rusiyaya ABŞ və müttəfiqlərinin tətbiq etdiyi sanksiyaların nəticələrindən qaçmağa kömək edir. Bayden administrasiyası artıq bununla bağlı Pekinə xəbərdarlıq da edib.
“Bloomberg”in həmsöhbətləri Çinin dövlət müəssisələrinin fəaliyyətini Rusiyaya şüurlu yardım kimi qiymətləndiriblər. ABŞ Milli Təhlükəsizlik Şurası və Mərkəzi Kəşfiyyat İdarəsi məsələ ilə bağlı şərh verməkdən imtina edib. Çinin Vaşinqtondakı səfirliyi isə agentliyin sorğularına cavab verməyib.
Agentliyin məlumatına görə, ABŞ administrasiyası Pekinin bəyanatlarının əksinə olaraq, Çinin Ukraynadakı münaqişə ilə bağlı neytral mövqe tutmadığına əmindir. Vaşinqtonun Rusiya iqtisadiyyatından uzaqlaşmaq çağırışlarına baxmayaraq, ölkə Moskva ilə ticarət əlaqələrini də gücləndirib. Ölkənin Baş Gömrük İdarəsinin məlumatına görə, 2022-ci ildə Çin və Rusiya arasında ticarət əvvəlki illə müqayisədə 29,3 faiz artaraq 190,3 milyard dollara çatıb. Çinin mal ixracı 12,8 faiz artaraq 76,1 milyard dollara, Rusiyadan idxal isə 43,4 faiz artaraq 114,1 milyard dollara yüksəlib.
“Bloomberg” yazır ki, ABŞ-ın strategiyası Rusiya hökumətini təcrid etmək və ölkə iqtisadiyyatını boğmaq üzərində qurulub və dünyanın ikinci ən böyük iqtisadiyyatı olan Çindən dəstəyin artması onu əhəmiyyətli dərəcədə sarsıda bilər.
ABŞ dəfələrlə Çinə Rusiyaya qarşı tətbiq edilən məhdudiyyətlərdən yayınmağın nəticələri barədə xəbərdarlıq edib və Pekini sanksiyalarla hədələyib. Vaşinqton həmçinin Pekinin Rusiya hərbi əməliyyatına maliyyə dəstəyi verə biləcəyini istisna etməyib. Buna cavab olaraq Çin Xarici İşlər Nazirliyi bəyan edib ki, ölkə bilərəkdən qadağalardan yan keçmir və Moskva ilə sadəcə normal ticarət əlaqələri saxlayır.
“Çin Ukraynadakı münaqişənin tərəfi deyil. Düşünmürük ki, bu, bizim hansısa ölkə ilə ticarətimizə təsir göstərməlidir”, – Çin XİN bildirib.
Azpost.info
