Piylənmədən əziyyət çəkən insanların xəstəxanaya yerləşdirilməsi və ya yoluxucu xəstəliklərdən ölmə ehtimalı normal çəkili insanlara nisbətən 70% daha yüksəkdir.
AzPost bildirir ki, bu barədə nüfuzlu tibb jurnalı The Lancet-də dərc olunan bir araşdırmada qeyd olunur.
Alimlər iki Finlandiya tədqiqatında 67.000-dən çox yetkin şəxsin və Britaniyanın 470.000-dən çox sakininin məlumatlarını təhlil ediblər. İştirakçılar 14 il ərzində izlənilib və tədqiqatın əvvəlində onların bədən kütlə indeksi (BKİ) qeydə alınıb.
Tədqiqatın nəticələri göstərib ki, piylənmədən əziyyət çəkən insanlarda xəstəxanaya yerləşmə və ya infeksiyalardan ölüm riski 70% artır. Ağır piylənmədə bu risk normal çəkili insanlara nisbətən üç dəfə artır.
Mütəxəssislər 10 ümumi yoluxucu xəstəliyi ətraflı araşdırıblar. Onlar piylənmənin demək olar ki, hamısında ağır fəsadlar riskini əhəmiyyətli dərəcədə artırdığını aşkar ediblər. Risk dairəsinə qrip COVID-19, pnevmoniya, sidik yolu infeksiyaları və tənəffüs yoluxucu xəstəlikləri olanlar daxildir. Tədqiqatçılar həmçinin qeyd ediblər ki, piylənmə ağır HİV və ya vərəm ehtimalını artırmır.
London Universitet Kollecinin professoru Mika Kivimakinin sözlərinə görə, bu zəiflik piylənmənin immun sistemini zəiflətməsi, onun bakteriya, virus, parazit və göbələklərlə mübarizə qabiliyyətini azaltması ilə əlaqədardır. Tədqiqatçılar bu hipotezin dolayı təsdiqini yalnız bədən çəkisini azaltmağa deyil, həm də ağır infeksiyalar riskini azaltmağa kömək edən arıqlama dərmanlarının tədqiqatında tapdılar.
Tədqiqatın müəllifləri piylənmənin rolunu nəzərə alan infeksiyanın qarşısının alınması yanaşmalarına yenidən baxılmasını tövsiyə edirlər. Onlar sübut olunmuş arıqlama metodlarının daha fəal şəkildə tətbiqini, yüksək risk qrupları üçün peyvənd proqramları planlaşdırarkən piylənməni nəzərə almağı və ictimaiyyətin sağlam qidalanmaya və fiziki fəaliyyət imkanlarına daha çox çıxışını təmin etməyi təklif edirlər.
