Azərbaycan prezidenti İlham Əliyev mayın 14-də Türkiyəyə səfər edəcək. Dövlət başçısı Rizə-Artvin hava limanının açılışında iştirak edəcək.
Azpost.info bildirir ki, bu barədə Anadolu Agentliyi məlumat yayıb. Prezident Ərdoğanla birgə açılış mərasiminə qatılacaq. Hər iki prezidenti gətirən təyyarə hava limanına ilk eniş edəcək.
Rizə-Artvin hava limanının açılışından sonra prezident Ərdoğan, Əliyev və digər qonaqlar şam yeməyinə qatılacaq.
Rize-Artvin Hava Limanının ildə təxminən 3 milyon sərnişinə xidmət göstərməsi planlaşdırılır. Çay yarpağı formalı giriş ornamenti və çay şüşəsi formalı hava hərəkətinə nəzarət qülləsi hava limanının yerli memarlığını əks etdirir.
Türk çayının təbliğ olunacağı Çaykur Muzeyi və mini çay fabriki də hava limanının daxilində yerləşəcək. Hava limanında ümumi 47 min 133 kvadratmetr qapalı sahə var. Açılış mərasimindən sonra Rizə-Artvin hava limanına uçuşlar başlayacaq.
