Azərbaycan Prezidenti İlham Əliyev ilə Ermənistanın baş naziri Nikol Paşinyanın Avropa İttifaqı Şurasının Prezidenti Şarl Mişelin vasitəçiliyi ilə keçirilən görüşü beynəlxalq, regional və yerli medianın gündəliyində xüsusi yer tutur. Bu, Brüssel sülh gündəliyinin müəyyənləşməsi və perspektivlər vəd etməsi ilə sıx bağlıdır. Brüssel gündəliyi Prezident İlham Əliyevlə Aİ-nin rəhbəri Şarl Mişelin ortaq əsəridir. Paşinyan isə həmmüəllif yox, iştirakçıdır.
Bu fikirləri açıqlamasında Milli Məclisin Mədəniyyət komitəsinin sədri Qənirə Paşayeva bildirib.
Bu formatda ilk üçtərəfli görüşün ötən il dekabrın 14-də keçirildiyini diqqətə çatdıran komitə sədrinin sözlərinə görə, nəticə etibarilə, artıq Brüssel sülh gündəliyi formalaşdırılıb: “Əgər qarşılıqlı etimad, perspektivə inam və imza qədər etibar qazanmış sözlər olmasaydı, tərəflər arasında görüşün əhəmiyyəti də olmayacaqdı. İndi isə obrazlı desək, dekabr aprelə, Brüssel bütün regiona daşınıb. Brüssel sülh gündəliyi öz işlək mexanizmlərini doğrultmaqdadır.
Aprelin 6-da üçtərəfli əsasda 5 saata yaxın davam edən görüş ilk üçtərəfli görüşün təsbiti, keçən müddətin analizi və bundan sonra olacaqların yol xəritəsini cızdı”.
Q.Paşayeva diqqətə çatdırıb ki, görüşün nəticəsi olaraq Şarl Mişelin verdiyi bəyanatda təsbit edildi ki, Ermənistanla Azərbaycan arasında sülh müqaviləsi üzrə danışıqlar başlayır. İki ölkənin xarici işlər nazirliklərinə uyğun təlimat verildi. Bu, məhz Azərbaycan Respublikasının irəli sürdüyü məlum 5 maddəlik təklifin qəbulu və bunun əsasında danışıqların aparılmasını ifadə edir. Bizim üçün ən əsas məqam Azərbaycanın ərazi bütövlüyüdür.
Bəyanatda Ermənistanla Azərbaycanın sərhəd məsələləri üzrə birgə komissiya yaratması, ilk növbədə delimitasiya prosesinə başlaması yönündə razılığın əldə olunduğu ifadə edilir. Təbii ki, delimitasiyanın nəticəsi olaraq sərhəddə gərginlik aradan qaldırılır.
“Aİ-nin minalardan təmizləmə, itkin düşmüş şəxslərin tapılması, eləcə də quruculuq işlərində Azərbaycana dəstək göstərməsi sənəddə təsdiq olunur.
Ayrıca, nəqliyyat- kommunikasiya xətləri də təsdiq olunur, dəmir yolunun, avtomobil yolunun çəkilməsi və iqtisadi məşvərət şurası mexanizminin yaradılması təsdiq olunur. Bəyanatda “Dağlıq Qarabağ” ifadəsi və haqlı olaraq “keçmişin qalığı” sayılan “Minsk Qrupu həmsədrlik institutu”na birmənalı istinad yoxdur. Aİ-nin dəstəyi ilə Ermənistan və Azərbaycan arasında birbaşa danışıqları nəzərdə tutan yeni mexanizm, format yaranır. Aydındır ki, bunun məqsədi ilk növbədə Ermənistanla Azərbaycan arasındakı münasibətlərin normallaşdırılmasıdır. Doğrudur, belə bir normallaşdırma bütün regiona, Azərbaycana, qonşularımıza, dostlarımıza da lazımdır, lakin bu ilk növbədə Ermənistana lazımdır”, – deyə deputat vurğulayıb.
Qənirə Paşayevanın sözlərinə görə, uğursuz dövlətin hərbi-siyasi rəhbərliyi bu doğruları nə qədər tez dərk və qəbul etsə, bu, ilk növbədə onların özü üçün faydalı olacaq. Sülh prosesini sabotaj etmək, ilk növbədə, Ermənistanın öz dövlətçiliyinə, sabitliyinə və iqtisadiyyatına mənfi təsir edəcək. İndi gedişat elədir ki, Ermənistan öz rəhbərinin imzasına hörmət etsə də, etməsə də, Paşinyan Brüssel razılaşmasına sadiq qalsa da, qalmasa da, Ermənistan çox təsirlənəcək. İndi buyursunlar, ya irəli dursunlar ya da geri. Yerində saymaq olmaz.
