Qazaxıstan hökuməti əcnəbi vətəndaşlar və vətəndaşlığı olmayan şəxslər üçün ölkəyə girişdə ödənişli elektron icazə sisteminin tətbiqini planlaşdırır.
Bu məqsədlə Qazaxıstan Daxili İşlər Nazirliyi müvafiq qanunvericilik dəyişiklikləri layihəsini ictimai müzakirəyə çıxarıb. Layihəyə əsasən, ölkəyə daxil olmaq üçün elektron icazənin rəsmiləşdirilməsi ödənişli olacaq. Lakin rüsumun məbləği hələ açıqlanmayıb.
Nazirlik bildirir ki, elektron icazələrin fərqli tariflərlə tətbiqi rəqəmsal infrastrukturun texniki xidmət və modernləşdirilməsinin maliyyələşdirilməsinə, həmçinin şəxsi məlumatların qorunmasının gücləndirilməsinə imkan verəcək.
Sənəd avqustun 17-dək ictimai müzakirədə qalacaq. Layihə qəbul edilərsə, yeni sistemin 2026-cı ilin avqust-dekabr ayları ərzində mərhələli şəkildə tətbiqi nəzərdə tutulur. Bu müddətdə sərhəd-keçid məntəqələrinin infrastrukturu yenilənəcək və sistemin sabit işləməsi təmin ediləcək.
Hazırda qanun layihəsinin tam mətni dərc olunmadığından, yeni qaydaların bütün əcnəbilərə, yoxsa yalnız müəyyən kateqoriyalara şamil ediləcəyi məlum deyil. Elektron icazənin qiyməti barədə də hələlik rəsmi məlumat verilməyib.
Qeyd edək ki, Qazaxıstan Prezidenti Kasım-Jomart Tokayevin daha əvvəl açıqladığı məlumata görə, ölkəyə ən çox turist göndərən dövlət Rusiyadır. Sonrakı yerlərdə isə Çin və Hindistan qərarlaşıb.
