Dişləmək
İşlədiyi üçün qısqandığı qadının əlini və üzünü dişləyən kişiyə məhkəmə hökmü oxunub.
Qaynarinfo-nun məlumatına görə, hadisə Şirvan şəhərində baş verib.
1993-cü il təvəllüdlü Əbülfəz Məmmədov (soyad şərtidir) əvvəldən tanıdığı, Şirvan şəhərində yerləşən “001” kafesində çalışan Y.D.-nı döydüyü üçün saxlanılıb.
Məlumata görə, Əbülfəz qadının iş yerinə gələrək onunla mübahisəyə başlayıb və işdən çıxmasını tələb edib. Daha sonra onlar qadının yaşadığı evə yollanıblar. Mübahisə evdə də davam edib. Bu zaman Əbülfəz qadının sağ qolunu və sol yanağını dişləyib. Qadın ani reflekslə onu itələyib. Bundan qəzəblənən kişi qadının boynundan tutaraq boğmağa çalışıb, ardınca isə burnuna yumruqla zərbə endirib.
Zərərçəkmiş qadın baş verənlərlə bağlı polisə müraciət edib. Məhkəmə qərarına əsasən, Əbülfəz Azərbaycan Respublikası Cinayət Məcəlləsinin 128-ci maddəsi (qəsdən sağlamlığa yüngül zərər vurma) ilə təqsirli bilinib. O, istintaq dövründə həbsdə saxlandığı 2 gün çıxılmaqla, ümumilikdə 11 ay 26 gün müddətinə azadlığın məhdudlaşdırılması cəzasına məhkum edilib. Bu müddət ərzində o, elektron qolbaqla nəzarət altında saxlanılacaq.
